ރައީސުލްޖުމްހޫރިއްޔާއަށް ދޭން އުޅުނު ހަމަލާއިން ސަލާމަތްވެވަޑައިގެންނެވުމުގައި ސިފައިންގެ ހުޝިޔާރުކަމާއި ކުޅަދާނަކާއި ޤާބިލުކަން ފާހަގަކުރެވިފައިވޭ
2008 ޖެނުއަރީ 8 ވަނަ ދުވަހަކީ ވަރަށް ބޮޑު ހައިރާންކަމަކާއި ކުއްލި ސިހުމެއް ލިބުނު ދުވަހެކެވެ. އެއީ ސިފައިންގެ އެންމެ މަތީވެރިޔާ އަދި ރާއްޖޭގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް އަވަހާރަކޮށްލުމަށް ނުރައްކާތެރި ހަމަލާއެއް ދޭން އުޅުނުދުވަހެކެވެ. ހއ. ހޯރަފުށްޓަށް ކުރެއްވި ދަތުރުފުޅުގައި އެމަނިކުފާނަށް މަރުޙަބާ ދެންނެވުމަށް އެއްވެތިބި މީހުންނާ ސަލާން ކުރައްވަމުން ގެންދަވަނިކޮށް ހޯރަފުށީ ކިނާރާ މުޙަންމަދު މުރުޝިދު ވަޅިއަކުން ދޭން އުޅުނު އެ ހަމަލާއިން ﷲ ގެ އިރާދަފުޅާއެކު އެމަނިކުފާނު ސަލާމަތްވެ ވަޑައިގެންނެވިއެވެ. މި ނުރައްކާތެރި ހަމަލާއިން ސަލާމަތްވެ ވަޑައިގެންނެވުމުގައި ރައީސުލްޖުމްހޫރިއްޔާގެ ހުޝިޔާރުކަމާއި، އެމަނިކުފާނުގެ ހަށިފާރަވެރިންގެ ގޮތުގައި ތިއްބެވި ސިފައިންގެ ކުޅަދާނަކަމާއި ސްކައުޓް ކުއްޖެއްކަމަށްވާ ހޯރަފުށި ދިވެލި މުޙަންމަދު ޖައިޝަމް އިބްރާހިމްގެ ހިތްވަރު ގަދަކަން ފާހަގަކުރެވިގެން ދިޔައެވެ.
ސިފައިންގެ އެންމެމަތީ ވެރިޔާ އަދި ރާއްޖޭގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމަށް މީހަކު ވަޅިއަކުން ދޭން އުޅުނު ހަމަލާއިންް އެމަނިކުފާނު ސަލާމަތްވެވަޑައިގެންނެވުމުގައި މޯލްޑިވްސް ނޭޝަނަލް ޑިފެންސް ފޯސްގެ ކްލޯސް ޕްރޮޓަކްޝަން ޓީމުން ކުރެއްވި މަސައްކަތްތަކަށް، އެޓީމުގެ މެންބަރުންނަށް ރައީސުލްޖުމްހޫރިއްޔާ ވަނީ ޝުކުރުއަދާކުރައްވާފައެވެ. ކްލޯސް ޕްރޮޓެކްޝަން ޓީމުގެ މެންބަރުންނަކީ ކަމަށް އެކަށީގެންވާ ހުނަރުވެރިކަން ޙާޞިލު ކުރައްވައި އަދި އެކަށީގެންވާ ތަމްރީން ހޯއްދަވާފައި ތިއްބެވި ބޭކަލުން ކަމަށާއި އެކަހަލަ ކަންތައްތައް ކޮންޓްރޯލް ކުރެއްވުމުގައި ވަރަށް ހުޝިޔާރުކަމާއެކީގައި މަސައްކަތްކުރައްވާ ބޭކަލުން ކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ. މި ރޮނގުން ވާހަކަފުޅު ދައްކަވަމުން އެ ނުރައްކާތެރި ހަމަލާއިން ރައީސުލްޖުމްހޫރިއްޔާ ސަލާމަތްވެ ވަޑައިގަތުމުގައި ސީ.ޕީ ޓީމުން ކުރެއްވި މަސައްކަތްތަކުގެ މައްޗަށް ބައްލަވާލައްވާ އެބޭކަލުންގެ ޚިދުމަތަށް ތަޢުރީފު ކުރެއްވިއެވެ.
ސިފައިންގެ ވެރިޔާ އަދި ރާއްޖޭގެ ރައީސުލްޖުމްހޫރިއްޔާ އަވަހާރަކޮށްލުމަށް މީހަކު ވަޅިން ހަމަލާދޭން އުޅުނު ހާދިސާއިން މާތްﷲ ހެ ހެޔޮ ރަޙުމަތްފުޅުން އެމަނިކުފާނު ސަލާމަތްވެވަޑައި ގަތުމާގުޅިގެން ހަމްދަރުދީއާއި ތާޢީދުގެ ޝުޢޫރުތައް ރާއްޖޭގެ ކަންކޮޅުތަކުގެ ރައްޔިތުން ފާޅުކޮށްފައިވެއެވެ. އަދި ބޭރުގެ ޤައުމުތަކުގެ ވެރިންނާއި ބައިނަލްއަގުވާމީ ޖަމާޢަތްތަކުން ވަރަށް ބޮޑަށް އެކަން ކުށްވެރިކުރައްވާފައިވެއެވެ. މާތްﷲ ގެ ހެޔޮ ރަޙުމަތްފުޅާއެކު އެ ނުރައްކާތެރި ހަމަލާއިން ސިފައިންގެ އެންމެ މަތީ ވެރިޔާ އަދި ރާއްޖޭގެ ރައީސުލްޖުމްހޫރިއްޔާ ސަލާމަތްވެވަޑައިގަތުމުން ސިފައިންގެ މަރުކަޒުތަކުގެ މިސްކިތްތަކުގައި ޝުކުރުގެ ދެރަކުޢަތް ނަމާދެއް ކުރުމާއި ޚާއްޞަ ދުޢާއެއްކުރުން ބާއްވާފައިވެއެވެ. މި ޝުކުރުގެ ދެ ރަކުޢަތް ނަމާދުގަޔާއި ޚާއްޞަ ދުޢާގައި އެމް.އެން.ޑީ.އެފް ގެ ޗީފް އޮފް ސްޓާފް މޭޖަރ ޖެނެރަލް މުޙަންމަދު ޒާހިރު އާއި ސިފައިންގެ އޮފިސަރުންނާއި އެކިއެކި ރޭންކު ތަކުގެ ގިނަ އަދަދެއްގެ ސިފައިން ބައިވެރިވެ ލައްވާފައިވެއެވެ.
ސިފައިންގެ ވެރިޔާ އަދި ރާއްޖޭގެ ރައީސުލްޖުމްހޫރިއްޔާ އަށް މީހަކު ވަޅިއަކުން ދޭންއުޅުނު ހަމަލާއަށްފަހު ޤައުމީ ދިފާޢީބާރު ބަދުނާމުކުރުމަށާއި ރައްޔިތުންގެ ހިތްތަކުގައި ސިފައިންނަށް އޮތް އިތުބާރު ގެއްލުވާލުމަށްޓަކައި ބަޔަކު މަސައްކަތްތަކެއް ކުރަމުން ގެންދިޔައެވެެ. ރައީސުލްޖުމްހޫރިއްޔާއަށް ތޫނު ހަތިޔާރަކުން ހަމަލާދޭން އުޅުނު ހާދިސާ ފުލުހުން ގެންދަވަނީ އެންމެ މަތީ ފެންވަރުގައި ތަހުގީގު ކުރައްވަމުންނެވެ. ތަހުގީގަށް ލިބިވަޑައިގަންނަވާ ކުރިއެރުންތައް މީޑިއާއަށް ހިއްސާ ކުރައްވަމުން ގެންދަވައެވެ. ފުލުހުންގެ ތަހުގީގުންނާއި މީޑިއާއަށް މިހާތަނަށް ހާމަކުރައްވާފައިވާ ވީޑިއޯ ތަކުން ރައީސުލްޖުމްހޫރިއްޔާއަށް ދޭން އުޅުނު ހަމަލާއިން އެމަނިކުފާނު ސަލާމަތްވެވަޑައިގެންނެވުމުގައި ޤައުމީ ދިފާޢީބާރުގެ ސިފައިންގެ ހުޝިޔާރުކަމާއި ކުޅަދާނަކާއި ޤާބިލުކަން ފާހަގަކުރެވިގެން ގޮސްފައިވެއެވެ.
ސިފައިންނަކީ އަބަދުވެސް ތެދުވެރިކަމާއި އިޚްލާޞްތެރިކަމާއެކު ޤައުމީ ޚިދުމަތުގައި ދެމިތިބި ބައެއްކަން ކޮންމެ ހާދިސާއަކުންވެސް މިދަނީ ފެންނަމުންނެވެ. ސިފައިންގެ ދެގޮތެއްނުވާ ހިތްވަރާއި އަޒުމަށް ގުޑުމެއް އަރުވާލެވިގެން ނުވާނެއެވެ. ޤައުމީ ވާޖިބާއި ޤައުމީ މަސްޢޫލިއްޔަތު އަދާކުރުމުގައި ތެދުވެރިކަމާއެކު ދެމިތިބިހާދުވަހަކު މި ޤައުމަށް ދެވޭ ކޮންމެ އުދުވާނީ ހަމަލާއަކާވެސް ފުރަތަމަ ކުރިމަތިލާން ތިބޭނެ ބަޔަކީ ސިފައިންނެވެ. މި ޤައުމު ހަލާކުގެ ތެރެއަށް އެއްލާލުމަށް އެކި ދުވަސްވަރު އެކި މީހުން ބޭނުންކުރަމުންދަނީ އެކި އުކުޅުތަކެވެ. ތަފާތު ގޮތްތަކެވެ. ރާއްޖޭގައި ސިފައިން އުފެދުނިއްސުރެ މިއަދާ ހަމައަށްވެސް މިއިން ކޮންމެ ކަމަކާ ސިފައިން ކުރިމަތިލާފައިވަނީ ޝުކުރާއި ތަޢުރީފު އެންމެ މަތީ ދަރަޖައަށް ޙައްޤުވާ މިންވަރަށެވެ. ޤައުމެއްގައި ދިފާޢީ ބާރެއްނެތްނަމަ އެ ޤައުމެއްގައި މިނިވަންކަމެއް ނޯންނާނެއެވެ. ޤައުމުގައި އޮންނާނީ ލޭ އޮހޮރުވުމެވެ. މުޅި ޤައުމު އަނދަމުންދާނީ ފިތުނައިގެ އަލިފާނުންނެވެ. މިއީ ޤައުމުގެ ދުޝްމިނުންނާއި ޚިޔާނާތްތެރިންނާއި ޣައްދާރުން ދުށުމަށް ކިތަންމެ ބޭނުން ދުވަހެއް ކަމަށްވިޔަސް ދިވެހި ސިފައިން އެ ފުރުސަތު ދީފައެއްނެތެވެ. އަދި ނުވެސް ދޭނެއެވެ.
No comments:
Post a Comment