ޣާފިލު ނުވެ، ލޯހުޅުވައިގެންތިބެ ޤައުމު ދިފާޢުކުރުން

ޣާފިލުވެއްޖެނަމަ ދީނާއި ސަގާފަތާއި އަނބިދަރިންވެސް ގެއްލުމުގެ ބިރު އެބައޮތް ް

2007 ސެޕްޓެމްބަރ 29 ގައި ސަލްޓަންޕާރކްގައި އައި.އީ.ޑީ އެއް ގޮއްވާލި ހާދިސާއަށްފަހު އެންމެ ބޮޑު ހައިރާން ކަމެއް ލިބުނީ އަލްގައިދާގެ ވީޑިއޯ ތައް ދުނިޔެއަށް އާންމުކުރަމުންދާ ވެބްސައިޓެއްގައި އއ. ހިމަންދޫގައި ހައްދުފަހަނައަޅާފައިވާ ގޮތްތައް ގެންއުޅޭ މީހުންނަށް އެހީވުމަށް ގޮވާލާފައިވާ ވީޑިއޯއެއް އާންމު ކުރުމުންނެވެ. އަޅުގަނޑުގެ ހިތަށް އެރިއެވެ. ހުރިހާ ފަރާތަކުން އަޅުގަނޑުމެންގެ ދީނަށާއި ސަގާފަތަށް މިހިރީ ދުނިތައް އަމާޒުވެފައެވެ. މިއީ ވަރަށް ކުޑަކުޑަ މީސްކޮޅު މަދު ޤައުމެކެވެ. ޒަމާނުއްސުރެ ސުލުހަވެރިކަމާއެކު ދިރިއުޅެމުން އައި ބަޔަކު އުޅުނު ޤައުމެކެވެ. އަޅުގަނޑުމެންގެ ކާބަފައިން އަޅުގަނޑުމެންނާ ހަމައަށް މި ޤައުމުގެ މިނިވަންކަން ފޯރުކޮށް ދިނުމަށް ކުރި މަސައްކަތްތަކަށްވުރެ ވަރުގަދަ މަސައްކަތްތަކެއް މިއޮތީ ކުރަން ޖެހިފައެވެ. ޤައުމު ދެކެ ލޯބިވާ ދީނަށް ވަފާތެރި ދަރިން ތަކަކަށް މިޤައުމު އެބަގޮވައެވެ. ޣާފިލުނުވެ، ލޯހުޅުވައިގެން ތިބެ ޤައުމު ދިފާޢުކުރާން އެބަޖެހެއެވެ.

ޗާޑަކީ އެފްރިކާގެ މެދުތެރޭގައި އޮންނަ ޤައުމެކެވެ. އަޣުލަބިއްޔަތު އޮންނަނީ މުސްލިމުންނަށެވެ. އާބާދީއަކީ 9.1 މިލިއަން މީހުންނެވެ. ޗާޑަކީ ބޭރުގެ އެހީއަށް އަބަދުވެސް ބޭނުންވެފައިވާ އަދި ބޭރުގެ އެހީދޭ އެކިއެކި ޖަމާޢަތްތަކުން ޙަރަކާތްތެރިވަމުން އަންނަ ޤައުމެކެވެ. 2007 ވަނަ އަހަރުގެ އޮކްޓޯބަރ މަހުގެ ތެރޭގައި " އެހީދޭ " ޖަމާޢަތަކުން ހިންގަން އުޅުނު ވަރަށް އަނިޔާވެރި އަމަލެއް އެ ޤައުމުގެ ސަލާމަތީ ބާރުން ވަނީ ހުއްޓުވާފައެވެ. އެހީދިނުމުގެ ނަމުގައި ޗާޑުގައި ޙަރަކާތްތެރިވަމުން ދިޔަ ފަރަންސޭސިވިލާތާއި ސްޕޭންގެ މީހުން ހިމެނޭ މި ޖަމާޢަތުން ދިހަ އަހަރާއި ސާދަ އަހަރާ ދެމެދުގެ ސަތޭކައަށްވުރެ ގިނަ ކުޑަކުދިން ވަގަށް ނެގިއެވެ. އެމީހުން މަސައްކަތްކުރީ މި ކުޑަކުދިންތައް ޔޫރަޕަށް ގެންދާށެވެ. މިކަން ހުއްޓުވީ އެކުދިން އަރުވައިގެން ދަތުރަށް ތައްޔާރުކޮށްފައިއޮތް މަތިންދާ ބޯޓް ޗާޑުގެ ސިފައިން ހަތިޔާރާއެކުގޮސް ވަށާލަައިގެންނެވެ. މިހާ ގިނަ އަދަދެއްގެ ކުޑަ ކުދިން ޔޫރަޕަށް ގެންދަން މި ޖަމާޢަތުން މަސައްކަތްކުރީ ކޮން ބޭނުމެއްގައިކަމާމެދު ދުނިޔޭގެ މީޑިއާގައި ފެތުރިފައިވާ ޚަބަރުތައް ތަފާތެވެ. ޗާޑުގެ ސަރުކާރުން ބުނެފައިވަނީ އެކުދިން ގެންދަން މަސައްކަތްކުރީ އެކުދިންގެ ކިޑްނީ އާއި ހަށިގަނޑުގެ ގުނަވަންތަކުގެ ބޭނުމުގައި ކަމަށެވެ. މީޑިއާގެ ބައެއް ރިޕޯޓްތައް ބުނެފައިވަނީ މިކަމުގެ ބޭނުމަކީ ވަގުތީ ފާހިޝް އަމަލުތައް ހިންގުން ކަމަށެވެ. އެހެން ބައެއް ރިޕޯޓްތަކުގައި ވާގޮތުގައި މިއީ އަަޅުންގެ ސިއްރު ވިޔަފާރިއެކެވެ. އަދި މިއީ ދީން ބަދަލުކޮށް މުޅި ޗާޑުގައި ކްރިސްޓިއަން ދީން ފެތުރުމަށް ހިންގާ ކެމްޕޭނެއްގެ ދަށުން ހިންގި ޝައިތާނީ އަމަލެއް ކަމަށްވެސް ބައެއް ރިޕޯޓްތަކުގައި ބަޔާންކޮށްފައިވެއެވެ.

ފަގީރު ޤައުމުތަކުގައި އެހީދޭ ޖަމާޢަތްތަކުގެ ގޮތުގައި ގިނައިން ހަރަކާތްތެރިވަނީ ހުޅަނގުގެ މުއްސަދި ޤައުމުތަކަށް ނިސްބަތްވާ ޖަމާޢަތްތަކުންނެވެ. މި ޖަމާާޢަތްތަކަށް ވަރަށް ގިނަ ފަގީރު ޤައުމުތަކުން ބަރޯސާ ވެއެވެ. ބައެއް ޤައުމުތަކުން އެ ޖަމާޢަތްތަކަށް ކޮށްފައިވާ އިތުބާރެއްގެ ސަބަބުން އެ ޤައުމުތައްވަނީ ވަރަށް ބޮޑު ޣާފިލުކަމެއްގެ ތެރޭގައެވެ. މީގެ ތެރޭގައި އިސްލާމީ ޤައުމުތައްވެސް ހިމެނެއެވެ. އިސްލާމީ ޤައުމުތަކުގައި ހުޅަނގުގެ ނަސޯރާ ޖަމާޢަތްތަކުން އެހީގެ ނަމުގައި އަޤީދާ ފާސިދު ކުރުމަށާއި ނަސޯރާދީނުގެ ގޮތްތައް ފެތުރުމަށް ކުރަމުންދާ މަސައްކަތް ވަރަށް ބާރު ސްޕީޑެއްގެ ކުރިއަށް ގެންދެއެވެ. އެހީ ފޯރުވައިދޭ މަދަދުގާރުންގެ ގޮތުގައި އިންސާނުންގެ ސިފަ ޖެހިގެން ތިބެ ޝައިތާނީ އަމަލުތައް ހިންގާ ފަރާތްތަކާމެދު ޣާފިލުވެގެން ތިބެއްޖެނަމަ ކޮންމެ ފަދަ ގޮތެއްވެސް މެދުވެރި ވެދާނެއެވެ. ދީނާއި ސަގާފަތާއި އަނބިދަރިން ގެއްލުމުގެ ބިރުވެސް އެބައޮތެވެ.

ރާއްޖެއަކީވެސް އިސްލާމީ ކުޑަކުޑަ ޤައުމެކެވެ. ރާއްޖޭގެ ދާޚިލީ ކަންތައްތަކުގެ ތެރެއަށް ވަންނަން މަސައްކަތްކުރާ ބޭރުގެ ގޮތްނޭނގޭ ޖަމާޢަތްތައްވެސް އުޅެއެވެ. ބައެއް ޖަމާާޢަތްތަކުން އެމީހުންނަކީ " އެހީދޭ " ޖަމާޢަތްތައް ކަމަށް ބުނަމުންދެއެވެ. އަދި ރާއްޖެއާ ބެހޭގޮތުން ތަފާތު ދިރާސާތައްކޮށް ތަފާތު ގޮތްގޮތަށް ރާއްޖޭގެ ދާޚިލީ ކަންތައްތަކަށް ފާޑުކިޔާ ނުފޫޒު ފޯރުވަން މަސައްކަތް ކުރަމުންވެސް ދެއެވެ. މިއީ އަޅުގަނޑުމެން ޣާފިލުވެގެންވާނެ ކަމެއްނޫނެވެ.

ކުރިމަތި ވަމުން އަންނަ ކޮންމެ ގޮންޖެހުމަށްވެސް އަޅުގަނޑުމެން ތިބެންވާނީ ތައްޔާރަށެވެ. ޤައުމީ ދިފާޢީ ބާރުގައި ސިފަވަންތަ ކަމާއި ޤާބިލުކަން އިތުރު ކުރަން ޖެހެއެވެ. އެކަމަށް ކުރަންޖެހޭ ހޭދަ އިތުރުކުރަން ޖެހެއެވެ. ޤައުމަށްޓަކައި ދީނަށްޓަކައި ފަސްނުޖެހި ކުރިއަށް ނިކުމެ ފުރާނައިން ޤުރުބާންވާން ތައްޔާރަށް ތިބި ސިފައިންނާއި އެހެން މީހުންނާ އެއް ހަމަ ނުވާނެކަން ޤަބޫލުކުރަން ޖެހެއެވެ. ސިފައިންނަށް ދެވޭ އިނާޔަތްތައް ކޮންމެ ޤައުމެއްގައިވެސް ނިސްބަތުން ބޮޑީ ސަބަބުތަކެއް އޮންނާތީއެވެ. އެ ސަބަބަކީ ސިފައިންނާ ޙަވާލުވެފައިވާ ވާޖިބާއި ޒިންމާތަކާއި މަސްޢޫލިއްޔަތެވެ. އިއްޔެވެސް މި ޤައުމުގެ މިނިވަންކަމާއި ދީނުގެ ދިފާޢުގައި ނިކުތީ ސިފައިންނެވެ. މާދަމާވެސް ނިކުމެ ކުރީ ސަފުގައި ފުރާނައިން ޤުރުބާން ޖެހިއްޖެނަމަ އެކަމަށްވެސް ފަސްނުޖެހި ކުރިމަތިލާނީީ ސިފައިންނެވެ. 1988 ނޮވެމްބަރު 3 ގެ ޢުދުވާނީ ޙަމަލާގައި ފުރަތަމަ ޝަހީދުވެގެން ވެއްޓުނީވެސް ސިފައިންގެ މީހެކެވެ. އެދުވަހު ދުސްމިނުންނާ ދެކޮޅަށް ފުރަތަމަ ޙަމަލާދިނީވެސް ސިފައިންގެ މީހެކެވެ. ރާއްޖޭގެ މިނިވަންކަން މިއަދާ ހަމައަށް އައިސްފައި މިއޮތީވެސް ދިވެހި ސިފައިންގެ މަތިވެރި ޤުރުބާނީގެ ސަބަބުންނެވެ. މި ޙަޤީޤަތްތަކުގެ ކުރިމަތީގައި ސިފައިންނަށް ކުރެވޭ ހޭދައަކީ ބޭކާރު ހޭދައެއް ކަމަށާއި ސިފައިންނަކީ ޤައުމަށް ބޭކާރު ބައެއް ކަމަށް ދައްކަން ކުރާ މަސައްކަތްވާނީ ފޫނެއް ފަޔަކަށް ފުރޭ ފެނެއް ކަމަށެވެ. މިބާވަތުގެ ވާހަކަތައް ދައްކާ މީހުންގެ މަޤުޞަދަކީ ޣާފިލުކަމުގެ ނިދިން ޤައުމު ނިންދަވާލުމެވެ.