ޢަބްދުﷲ ސަޢީދު
"ޤައުމެއް ކުރިއަރައިދިއުން އޮތީ، އެ ޤައުމެއް ހިންގުމުގައި ބޭނުންކުރެވޭ ވެރިކަމުގެ ނިޒާމެއްގެ ސަބަބުން ނޫންކަން ހަނދާން ނައްތާ ނުލަމާތޯއެވެ! އަދި ކިއެއްތަ، ޤައުމެއްގެ ކުރިއެރުމާއި ރައްޔިތުންގެ ލާބައާއި މަންފާ އޮތީ، އެވެރިކަމެއް ހިންގޭ ގޮތްތަކެއްގެ މައްޗަށެވެ." މިއީ ދިވެހީންނަށް ޖުމްހޫރީ ވެރިކަން ތަޢާރަފުކޮށްދެއްވި ސުމުއްވުލް އަމީރު މުޙައްމަދު އަމީން ދޮށިމޭނާ ކިލެގެފާނު ވިދާޅުވެފައިވާ ވާހަކަފުޅެކެވެ. އެ މަނިކުފާނު މިހެން ވިދާޅުވީ ދިވެހިރާއްޖެއަށް ޖުމްހޫރީ ވެރިކަން ތަޢާރަފު ކޮށްދެއްވި ދުވަހު އާ ގާނޫނު އަސާސީ މަޖިލީހުން ފާސްކުރެއްވުމުން ރައްޔިތުންގެ މަޖިލީހުގައި ތަޤުރީރު ކުރައްވަމުންނެވެ. 1 ޖަނަވަރީ 1953 ގައި ކުރެއްވި މި ތާރީޚީ ތަޤުރީރަކީ ދިވެހިރާއްޖެއަށް ތަޢާރަފު ކުރެއްވި ވެރިކަމުގެ އައު ނިޒާމަށް މަރުޙަބާ ވިދާޅުވެ ދެއްވި ތަޤުރީރެކެވެ. ވަރަށް ކުލަގަދަ ރަސްމިއްޔާތަކާއެކު އުފެދިގެން ދިޔަ ފުރަތަމަ ޖުމްހޫރީ ވެރިކަން 1953 އޮގަސްޓު 21 ވަނަ ދުވަހު އުވިގެންދިޔައިރު އެ ޖުމްހޫރިއްޔާއަށް ވީ އެންމެ 7 މަހާއި 26 ދުވަހެވެ.
