ކޮންމެ ގޮންޖެހުމަކާ ސިފައިން ކުރިމަތިލާފައިވަނީ ޤައުމީ ޖޯޝާއި ދީނީ ރޫޙާ އެކު ވަރުގަދަ އަޒުމެއްގައި
2007 ސެޕްޓެމްބަރ 29 ވަނަ ދުވަހު މާލޭ ސަލްޓަންޕާކުގައި ގޮއްވާލި އިމްޕްރިވައިސްޑް އެކްސްޕްލޯސިވް ޑިވައިސް ( އައި.އީ.ޑީ ) ގެ އަޑާއެކު އާ ގޮންޖެހުންތަކަކާ ސިފައިންނަށް މިވަނީ ކުރިމަތިލާން ޖެހިފައެވެ. ޤައުމީ ސަލާމަތަށް އެއީ ވަރުގަދަ އިންޒާރެކެވެ. މައްސަލަ ތަހުޤީޤުކޮށް ނުނިމުނު ކަމުގައިވިޔަސް ރާއްޖޭގައި މި ހާދިސާއިން ދީނީ ގޮތުން ހައްދު ފަހަނައަޅާފައިވާ މީހުން ދަތުރުކޮށްފައިވާ ހިސާބާއި އެމީހުންގެ ނުރައްކާ ބޮޑުވެފައިވާ މިންވަރު ވަޒަން ކުރެވިއްޖެއެވެ. ކުރިން މިފަދަ ޚަބަރުތަކާއި މަންޒަރުތައް އިވި، ފެންނަމުންދަނީ ދުނިޔޭގެ ޚަބަރު ފަތުރާ ވަސީލަތްތަކުން ނެވެ. މިހާރު މި ބިރުވެރިކަން ރާއްޖޭގައިވެސް މިވަނީ ފެށިފައެވެ. ދުނިޔޭގައި ޓެރަރިޒަމްގެ ބިރުވެރިކަމުން ސަލާމަތްވެފައިވާ ޤައުމެއްނެތެވެ.
ދީނީ ގޮތުން ހައްދުފަހަނައަޅާ ދިއުމަކީ ވަރަށް ނުބައި ބަލިމަޑުކަމެކެވެ. އިސްލާމީ ޤައުމުތަކުގައި ދާޚިލީ ހަމަނުޖެހުންތައް އުފެދި ބޮޑެތި ލޭ އޮހޮރުވުންތައް ހިނގަނީ ދީނީ ޚިޔާލު ތަފާތުވުންތަކާއި ދީނީ ގޮތުން ހައްދުފަހަނައަޅާ ދިއުމުގެ ސަބަބުންނެވެ. ރާއްޖެއަކީ މީގެ ކުރިން ދީނީ ޚިޔާލު ތަފާތުވުންތަކާއި ދީނީގޮތުން ހައްދު ފަހަނައަޅާދާ މީހުންގެ ސަބަބުން ލޭ އޮހޮރިފައިވާ ޤައުމެއްނޫނެވެ. ސައްތައިން ސައްތަ މުސްލިމް ޤައުމެއްގެ ގޮތުގައި އެއްޖީލުން އަނެއް ޖީލަށް މި ޤައުމު ދަތުރުކުރަމުން އައީ ސުލުހަވެރި އަމާން އެކުވެރި ޤައުމެއްގެ ގޮތުގައެވެ. ދުނިޔެމަތީގެ ސުވަރުގޭގެ ނަމުން މިޤައުމުގެ ނަން މަޝްހޫރުވެފައިވެފައިވެއެވެ.
ދީނީ ގޮތުން ހައްދު ފަހަނައަޅާދާ މީހުން ދެކޭގޮތުގައި ހަމަ އެކަނި މުސްލިމުންނަކީ އެބައި މީހުންނެވެ. އެމީހުން އުޅޭގޮތާއި އެމީހުުން އުޅޭ އުޅުމާއި އެމީހުން އަމަލުކުރާގޮތް ނޫން ގޮތެއް އެމީހުން ގަބޫލުކުރާކަށް ބޭނުމެއްނުވެއެވެ. ސަރުކާރާއި ވެރިން ޤަބޫލުކުރުމެއްނެތެވެ. ރައްޔިތުންގެ ލާބަޔާއި މަންފާއާއި ޙައްޤުތައް ރައްކާތެރިކޮށް ދިނުމާއި އަދުލު އިންސާފު ގާއިމު ކުރުމަށް ހެދިފައިވާ ޤާނޫނު ތަކާއި ޤަވާޢިދު ތަކަކީވެސް އެމީހުންނަށް ކަމުދާ އަދި ބޯލަބަންޖެހޭ އެއްޗެއްސަކަށް ނުވެއެވެ. މިހިސާބުން ނިމުނީއެއް ނޫނެވެ. ދީނުގެ ނަމުގައި މުސްލިމުންނާއި ޣައިރު މުސްލިމުންގެ ތެރެއިން އެމީހުން ޤަބޫލުކުރާ ގޮތްނޫން އެހެން ގޮތްތަކަށް އުޅޭ މީހުން މަރާ ނެތިކޮށްލުމަށް " ޖިހާދު" ކުރުމުގެ ނަމުގައި ހިންގަމުންދާ ޓެރަރިސްޓް އަމަލުތައް މިއަދު ވެފައިވަނީ މުޅި ދުނިޔޭގެވެސް އެންމެ ބޮޑު އެއް ބިރަށެވެ. ސަލްޓަންޕާކުގައި އައި.އީ.ޑީ ގޮއްވާލި ހާދިސާ އާއި އއ. ހިމަންދޫގައި ދުރާލާ ތައްޔާރުވެގެންތިބެ ޤައުމީ ދިފާޢީ ބާރުތަކާ ފަންޑަމެންޓަލިސްޓުން ކުރިމަތިލި ކުރިމަތި ލުމަކީ އެމީހުންގެ ނަޒަރުގައި " ޖިހާދެ"ވެ. އެހެން މީހުންނާއި ޤާނޫނުތަކުގެ ކުރިމަތީގައި އެއީ ޓެރަރިޒަމެވެ.
ޓެރަރިސްޓް ޖަމާޢަތެއް ކަމަށް ދުނިޔެ ޤަބޫލުކުރާ، އަވަށްޓެރި ސްރީލަންކާގައި ވަކިވެގަތުމަށް މަސައްކަތްކުރާ ތަމަޅަ ޓައިގަރުންގެ ހަތިޔާރު ބޯޓަކާ ސިފައިން ކުރިމަތިލާ ބޯޓަށް ހަމަލާދީ އަޑިއަށް ދުއްވާލިތާ މިވީ އެންމެ ހަތަރު މަހެވެ. ރާއްޖޭގައި އެހެން ބާވަތެއްގެ ޓެރަރިސްޓް ހަމަލައެއް މިވަނީ ދީފައެވެ. ގޮންޖެހުމަކަށްފަހު ގޮންޖެހުމެއް މިއަންނަނީ ކުރިމަތިވަމުންނެވެ. އާ ގޮންޖެހުންތައް ކުރިމަގުގައިވެސް ކުރިމަތިވާނެއެވެ. އަޅުގަނޑުމެން ޖެހޭނީ އަބަދުވެސް ތައްޔާރަށް ތިބޭށެވެ. ކޮންމެ ގޮންޖެހުމަކާ ސިފައިން ކުރިމަތިލާފައިވަނީ ޤައުމީ ޖޯޝާއި ދީނީ ރޫޙާ އެކު ވަރުގަދަ އަޒުމެއްގައެވެ.
No comments:
Post a Comment