ކޮންމެ އެއްޗަކަށްވެސް މަޤާމެއް އޮންނާނެ ހެއްޔެވެ؟

ކޮންމެ އެއްޗަކަށްވެސް މަޤާމެއް އޮންނާނެ ހެއްޔެވެ؟

ކޮންމެ އެއްޗަކަށްވެސް އެއެއްޗެއް އޮންނަންވީ ވަކި ޚާއްޞަ މަޤާމެއް އޮންނާނެއެވެ. އެ އެއްޗެއްގެ އަގު އޮންނާނީ އެމަޤާމެއްގައި އޮންނައިރުގައެވެ. އެއެއްޗަކުން ނަގާ އެއެއްޗެއް އޮންނަންވީ މަޤާމު ނޫން އެހެން ތަނެއްގައި އޮންނައިރު އެ އެއްޗެއްގެ އަގެއް ނޯންނާނެއެވެ. އަދި އެއެއްޗަކަށް ލިބެންވީ އިޙްތިރާމެއްވެސް ނޯންނާނެއެވެ. މިއީ ތެދެއް ހެއްޔެވެ؟

މިއީ ބައެއް މީހުން ޤަބޫލުކުރާ ފިލޯސަފީއެކެވެ. އެކަމަކު މިއީ އަހަރެން ޤަބޫލުކުރާ ފިލޯސަފީއެއް ނޫނެވެ. އަހަރެން ޤަބޫލުކުރަނީ އަގުހުރި އެއްޗެއް ކޮންމެ ތަނެއްގައި އޮތަސް އެވާނީ އަގުހުރި އެއްޗަކަށެވެ. އޭތި އޮންނަ ތަނެއްގެ ސަބަބުން އޭގެ އަގު ވެއްޓިގެން ނުދާނެއެވެ. އަދި އެއީ އަގުހުރި އެއްޗެއް ކަމަކަށް ނުވެއެއް ނުދާނެއެވެ. އެހެންނަމަވެސް އެއެއްޗެއް އޮންނަ ތަނެއްގެ ސަބަބުން އެހެން މީހުންނަށް އެއީ ކިހާ އަގުހުރި އެއްޗެއްކަން ނޭގި އޮވެދާނެއެވެ.

އެއްޗެއް ނުފެނުމަކީ ނުވަތަ އެއެއްޗެއްގައި ހުރި ރަނގަޅުކަމެއް އެހެން މީހުންނަށް ނޭގުމަކީ ހަގީގަތުގައި އެއެއްޗެއްގެ ދެރަކަމެއް ނޫނެވެ. އަދި އެއީ ހަގީގަތެއްވެސް ނޫނެވެ. ފެންފޮދަކަށް ހަމަލޮލުން ބެލުމުން އޭގެ ތެރެއިން އެއްވެސް އެއްޗެއް ނުފެނެއެވެ. އެހެންނަމަވެސް އެއީ އެއްވެސް އެއްޗެއްނެތް އެއްޗެއް ނޫނެވެ. މައިކްރޮސްކޯޕަކުން ބަލާލުމުން އޭގެ ތެރެއިން ހަމަލޮލަށް ނުފެނުނު އެތައް އެއްޗެއް ފެންނާނެއެވެ. ހަގީގަތަކީ އެއީއެވެ.

ދުނިޔޭގެ ކާއިނާތުގައި ނުވަތަ ފަޒާގެ ތެރޭގައި އަހަރެމެންނަން ނުފެންނަ އެތައް އެއްޗެއްސެއްވެއެވެ. އެކަން ޤަބޫލުކުރަން ޖެހެއެވެ. އަހަރެމެންނަށް އެތަކެތި ނުފެނުމަކީ އެއެއްޗެތި ނެތުމެއް ނޫނެވެ.

ގޮނޑުގެ ކުނިތަކުގެ ތެރޭގައި ވަޅުޖެހިފައި އޮންނަ ޖަވާހިރެއްގެ އަގު އެކުނިގޮނޑުގައި އޮންނައިރާއި ޖަވާހިރު ބޭއްވުމަށް މަހުމާ ޖަހާފައިވާ ސޯކޭހެއްގައި އޮންނައިރާ ތަފާތުވާނެއެވެ. ކޮންމެ އެއްޗެއްގެވެސް އަގު އޮންނާނީ އޭގެ މަޤާމުގައި އޮންނައިރުއޭ ބުނެވެނީ އެހެންވެގެންކަމަށް ވެދާނެއެވެ. ނަމަވެސް ގޮނޑުގައި އޮތީ ޖަވާހިރެއްކަން އެނގުމާއެކު އޭގެ އަގު އުފުލެއެވެ. އޭގެ އަސްލު މަޤާމަށް އޭތި އާދެއެވެ. ކޮންމެ އެއްޗެއްވެސް އޮންނަންވާނީ އޭގެ މަޤާމުގައޭ ބުނެވޭ ބަހަށް އެއްބަސް ނުވެވެނީ އެހެންވެގެންނެއެވެ.

ދިވެހިރާއްޖޭގެ މޫސުން

ދިވެހިރާއްޖޭގެ މޫސުން

ދިވެހިރާއްޖޭގައި އޮންނަނީ ދެ މޫސުމެވެ. އެއީ ހުޅަނގު މޫސުމާއި އިރުވައި މޫސުމެވެ. ހުޅަނގު މޫސުމްގައި އޮންނަނީ 18 ނަކަތެވެ. އިރުވައި މޫސުމުގައި އޮންނަނީ 9 ނަކަތެވެ. ހުޅަނގު މޫސުން ފެށެނީ އޭޕްރީލް މަހުގެ 8 ވަނަ ދުވަހުއެވެ. ނިމެނީ ޑިސެމްބަރު މަހުގެ 9 ވަނަ ދުވަހުއެވެ. އިރުވައި މޫސުން ފެށެނީ ޑިސެމްބަރ 10 ވަނަ ދުވަހުއެވެ. ނިމެނީ އޭޕްރީލް މަހުގެ 7 ވަނަ ދުވަހުއެވެ.

ހުޅަނގު މޫސުމްގެ ނަކަތްތައް

1- އައްސިދަ ( އޭޕްރީލް 8 އިން އޭޕްރީލް 21 އަށް )

2- ބުރުނު ( އޭޕްރީލް 22 އިން މެއި 5 އަށް )

3- ކެތި ( މެއި 6 އިން މެއި 19 އަށް )

4- ރޯނު ( މެއި 20 އިން ޖޫން 2 އަށް)

5- މިއަހެލި ( ޖޫން 3 އިން ޖޫން 16 އަށް )

6- އަދަ ( ޖޫން 17 އިން ޖޫން 30 އަށް)

7- ފުނޯސް ( ޖުލައި 1 އިން ޖުލައި 14 އަށް)

8- ފުސް ( ޖުލައި 15 އިން ޖުލައި 28 އަށް)

9- އަހުލިހަ ( ޖުލައި 29 އިން އޯގަސްޓް 10 އަށް)

10- މާ ( އޯގަސްޓް 11 އިން އޯގަސްޓް 23 އަށް)

11- ފުނަ ( އޯގަސްޓް 24 އިން ސެޕްޓެމްބަރ 6 އަށް )

12- އުތުރަ ( ސެޕްޓެމްބަރ 7 އިން ސެޕްޓެމްބަރ 20 އަށް)

13- އަތަ ( ސެޕްޓެމްބަރ 21 އިން އޮކްޓޯބަރ 3 އަށް)

14- ހިތަ ( އޮކްޓޯބަރ 4 އިން އޮކްޓޯބަރ 17 އަށް)

15- ހެއި ( އޮކްޓޯބަރ 18 އިން އޮކްޓޯބަރ 31 އަށް)

16- ވިހާ ( ނޮވެމްބަރ 1 އިން ނޮވެމްބަރ 13 އަށް)

17- ނޮރަ ( ނޮވެމްބަރ 14 އިން ނޮވެމްބަރ 26 އަށް)

18- ދޮށަ ( ނޮވެމްބަރ 27 އިން ޑިސެމްބަރ 9 އަށް )

އިރުވައި މޫސުމުގެ ނަކަތްތައް

1- މުލަ ( ޑިސެމްބަރ 10 އިން ޑިސެމްބަރ 22 އަށް)

2- ފުރަހަޅަ ( ޑިސެމްބަރ 23 އިން ޖެނުއަރީ 5 އަށް)

3- އުތުރުހަޅަ ( ޖެނުއަރީ 6 އިން ޖެނުއަރީ 18 އަށް)

4- ހުވަން ( ޖެނުއަރީ 19 އިން ޖެނުއަރީ 31 އަށް)

5- ދިނަށަ ( ފެބްރުއަރީ 1 އިން ފެބްރުއަރީ 13 އަށް)

6- ހިޔަވިހާ ( ފެބްރުއަރީ 14 އިން ފެބްރުއަރީ 26 އަށް)

7- ފުރަބަދުރުވަ ( ފެބްރުއަރީ 27 އިން މާޗް 11 އަށް)

8- ފަސްބަދުރުވަ ( މާޗް 12 އިން މާޗް 25 އަށް)

9- ރޭވަ (މާޗް 26 އިން އޭޕްރީލް 7 އަށް)