ރާއްޖެ އިސްލާމްވި ދުވަހާގުޅޭ ވީޑިއޯ ރިޕޯޓް - 2011
ލިޔުނީ: ޢަބްދުﷲ ސަޢީދު
c هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ (އައްޞައްފު:9) މާނައަކީ: ''އެ ކަލާނގެ އީ، ޙައްޤު ދީނާއިގެން، އެ ކަލާނގެ ރަސޫލާ، ފޮނުއްވި ރަސްކަލާނގެއެވެ. އެ ދީން އެހެން އެންމެހައި ދީންތަކުގެ މައްޗަށް ފެތުރި ފައުޅުވެ ގަދަވެގެން އަންނާނެ ގޮތް މެދުވެރިކުރެއްވުމަށްޓަކައެވެ.''
މާތްވެގެންވާ އިސްލާމް ދީނަކީ، އިންސާނުން އަމިއްލައަށް ހެދި ދީނެއް ނޫން. އަދި އިންސާނުންގެ ހަވާނަފްސަށް ތަބާވާ ދީނެއް ވެސް ނޫން. އެކަމަކު އިސްލާމް ދީނަކީ، ސަމާވީ ދީނެއް. މާތް ﷲ ބާވައިލެއްވެވި ދީނެއް. މިއީ ހުރިހާ ރަސޫލު ބޭކަލުންނާއި ނަބީ ބޭކަލުންވެސް ގޮވާލެއްވި ދީން. އިސްލާމްދީނަކީ ޞުލުޙައިގެ ދީން. މިއީ މިނިވަންކަމުގެ ދީން، މިއީ ޢަދުލުވެރިކަމުގެ ދީން، މިއީ ރަޙުމަތުގެ ދީން. މިއީ އެހީތެރިކަމުގެ ދީން، މިއީ މެދުމިންކަމުގެ ދީން، މިދީނަކީ ހަމަހަމަކަމުގެ ދީން. މިއީ ދުނިޔެއާއި އާޚިރަތުގެދީން.
މި ދީނުގެ ޙުކުމްތަކަކީ، ﷲ ޢަމުރު ކުރެއްވި ކަންތައްތައް. ޙަރާމް ކަންތައްތަކަކީ، ﷲ ނަހީ ކުރެއްވި ކަންތައްތައް. ޙަލާލް ކަންތައްތަކަކީ ﷲ ހުއްދަ ކުރެއްވި ކަންތައްތައްތައް. މި ދީނުގެ މައިގަނޑު މަޞްދަރަކީ ކީރިތި ޤުރުއާނާ، ކީރިތި ރަސޫލު -ޞައްލަﷲ ޢަލައިހި ވަސައްލަމަ- ގެ ޙަދީޘްފުޅުތައް. އެހެންވެ މި އަދާ ޖެހެންދެން ވެސް މި ދީނުގެ އަސްލަށް ބަދަލުތަކެއް އައިސްފައެއްނެތް. އަޅުގަނޑުމެން އެންމެހާ ދިވެހިންނަށް މި މަތިވެރި ދީނުގެ އަހުލުވެރިންނަށް ވުމުގެ ހެޔޮ ނަސީބު މިންވަރުކުރެއްވީތީ، އަދި މި ލޮބުވެތި ވަޠަނަކީ ސައްތައިން ސައްތަ މުސްލިމް ޤައުމަކަށްވީތީ އެ ކަމަށްޓަކައި މާތް ﷲ އަށް ޝުކުރުވެރިވާންޖެހޭ.
ތާރީޚުން އެނގޭގޮތުގައި ރާއްޖޭގައި މީހުން އުޅެން ފެށީންސުރެ ދިވެހިންނަކީ ބުދު ދީނުގެ ތަފާތު ކަފިތަކަށް އުޅެމުން އައި ބައެއް. ތާރީޚީ ލިޔުންތަކާއި ރާއްޖެއިން ފެނިފައިވާ އާސާރީ ތަންތަނާއި އެތަންތަނުން ފެނިފައިވާ ތަކެތިން މިކަން ސާބިތުވޭ. ރާއްޖޭގެ ތާރީޚު ލިޔުއްވި ހުރިހައި ލިޔުންތެރިންވެސް އިއްތިފާޤުވާ އެއް މައްސަލައަކީ ރާއްޖެ އިސްލާމްވުމުގެ ކުރިން ރާއްޖޭގައި އޮތީ ބުދުދީންކަން.
ދިވެހިރާއްޖޭގައި މީހުން ވަޒަންވެރިވެގެން އުޅެންފެށީންސުރެ އެދީނަކަށް އަޅުކަންކުރަމުންއައި ބުޑިސްޓުދީން ދޫކޮށްލައި ދިވެހި ދައުލަތުން ރަސްމީގޮތުގައި އިސްލާމްދީން ޤަބޫލުކޮށް ދިވެހިރާއްޖޭގެ ރައްޔިތުން އެދީނަށް އެނބުރުމަށް އޭރުގެ ރަދުން އަމުރުކުރެއްވީ ހިޖުރައިން 548 ވަނަ އަހަރުގެ ރަބީޢުލްއާޚިރު މަހުގައި. އެތާރީޚު ދިމާވަނީ މީލާދީ ތާރީޚުން 1153 ވަނަ އަހަރުގެ ޖޫން މަހަށް.
ރަސްމީގޮތުން ދިވެހި ދައުލަތުން ޤަބޫލު ކުރައްވާގޮތުގައި ރާއްޖެ އިސްލާމް ކުރެއްވި ބޭކަލަކީ މަޣްރިބުކަރައިގެ މައުލާނަ އަލްޙާފިޒު އަބުލްބަރަކާތު ޔޫސުފުލް ބަރްބަރީ. މޮރޮކޯ ގެ މި ދަތުރުވެރިޔާއަކީ ހިޖުރައިން ހަވަނަ ޤަރުނުގެ ތެރޭގައި އިސްލާމްދީނަށް ނުހަނު ޚިދުމަތްކުރެއްވި ބޭކަލުންގެ ތެރޭގައި ހިމެނިވަޑައިގަންނަވާ ބޭކަލެއް.
ރާއްޖެ އިސްލާމްވިއިރު ރާއްޖޭގެ ރަސްކަމުގައި ހުންނެވީ ތީމުގޭ މަހާކަލަމިންޖާ. އިސްލާމްވެވަޑައިގަތުމަށްފަހު އެރަސްގެފާނުގެ ނަންފުޅަކީ އައްސުލްތާން މުޙައްމަދު ބުނު ޢަބްދުﷲ . އެއީ ދަރުމަވަންތަ ރަސްގެފާނު. އެ ރަސްގެފާނަށް ނިސްބަތްކޮށް ނަންދެވިފައިވާ ތާރީޚީ މިސްކިތެއް މާލޭގައި އެބަހުރި. އެއީ ދަރުމަވަންތަ މިސްކިތް. އެރަދުންނަކީ މާތްވެގެންވާ އިސްލާމްދީނަށް ތެދުވެރި ރައްޔިތުންނަށް އިޚުލާސްތެރި އޯގާތެރި ރަސްކަލެއް.
ހިޖުރައިން548 ވަނަ އަހަރުގެ ރަބީޢުލްއާޚިރު މަހު ދިވެހިން ބުދު ދީނުން މާތްވެގެންވާ އިސްލާމްދީނަށް އެނބުރުނީއްސުރެ އަދިއަދަށް ދާންދެންވެސް މިރާއްޖޭގައި މިއޮތީ އިސްލާމްދީން. ރާއްޖޭގެ މީސްތަކުން އިސްލާމްވީއްސުރެ ދިވެހިންނަކީ ދީނަށް ޙުރުމަތްތެރިކޮށް ހިތާ އިޢުތިޤާދު ހަރަދަނާ ބައެއް. ޒަމާނުއްސުރެ ދިވެހިންގެ މިނިވަންކަމާއި އިސްތިޤްލާލު ދިފާޢުކުރުމާއި ހިމާޔަތް ކުރުމުގައި އަދި ދިވެހިން ޤުރުބާންވެފައިވަނީ އިސްލާމްދީނުގެ ޙައްޤުގައި. ދިވެހިންގެ މެދުގައި ޒަމާނުއްސުރެ އޮތް އެކުވެރިކަމާއި އެއްބައިވަންތަކަމާއި އެއްބައެއްވަންތަކަން ދެމިއޮތުމުގެ ސިއްރަކީ ދިވެހިން އިސްލާމްދީނުގެ ހިދާޔަތުގެ ނޫރުގައި ހިފަހައްޓައިގެން ތިބި ތިބުން. ދިވެހިންގެ މެދުގައި އޮތް ދީނީ އެއްބައިވަންތަކަން. ދިވެހިންގެ މެދުގައި ދީނީ ބައިބައިވުންތަކަށް ޖާގަނުދީ ސާބިތުކަންމަތީ ދެމިތިބި ދެމިތިބުން.
މިއީ ދިވެހިރާއްޖެ އިސްލާމްވި ދުވަސް ފާހަގަ ކުރަން ފެށުނު ގޮތަކީކޮބާތޯ ބަލާލަން މުނާސަބު ވަގުތެއް. ރާއްޖެ އިސްލާމްވީ ދުވަހުގެ ގޮތުގައި ދުވަހެއް އެންމެ ފުރަތަމަ ފާހަގަކުރެވުނީ އައްސުލްޠާން މުޙަންމަދު ފަރީދުލް އައްވަލްގެ ރަސްކަމުގެ ވަރަށް ކުރީކޮޅު. ވަޒީރުންގެ މަޖިލީހުން ފާސްކުރެއްވި ފާސްކުރެއްވުމެއްގެމަތިން ރާއްޖެ އިސްލާމްވި ދުވަސް އެންމެ ފުރަތަމަ ފާހަގަކުރީ 1374 ވަނަ އަހަރުގެ ރަބީޢުލްއާޚިރު މަހުގެ 2 ވަނަ ދުވަހު. އެއީ މީލާދީން 1954 ވަނަ އަހަރުގެ ނޮވެމްބަރ މަހުގެ 28 ވަނަ ދުވަސް.
No comments:
Post a Comment