ޤައުމީ ޚިދުމަތްތެރިންގެ ތެރެއިން: ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރު

 

 ޢަބްދުﷲ ސަޢީދު 

ގ. މޫނިމާގެ، ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރު ގިނަ ބަޔަކު ދެނެވަޑައިގަންނަވަނީ "މައިދީ"ގެ ނަންފުޅުންނެވެ.  އައްސުލްޠާން މުޙައްމަދު ޝަމްސުއްދީން (3ވަނަ) އަށް މުނިކާފަ ވިދާޅުވާ ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރުގެ ބައްޕާފުޅު ޞާޙިބުއްސަޢާދަތު އޮނަރަބަލް އަންނަބީލް ޙަސަން ޒަރީރަކީ ދިވެހިރާއްޖޭ ރައީސުލްޖުމްހޫރިއްޔާގެ ނާއިބުކަމާއި ބޮޑުވަޒީރުގެ ނާއިބުކަމާއި، ދައުލަތުގެ އިސް މަޤާމުތަކެއް ފުރުއްވި ޢިއްޒަތްތެރިއެކެވެ. ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރަކީ އައްސުލްޠާނުލްޣާޒީ ޙަސަން ޢިއްޒުއްދީން (ދޮންބަންޑާރައިން)ގެ، އައްސުލްޠާން ޙަސަން ނޫރައްދީން (1ވަނަ) ގެ، އައްސުލްޠާން މުޙައްމަދު މުޢީނުއްދީން (1ވަނަ)ގެ، އައްސުލްޠާން މުޙައްމަދު ޢިމާދުއްދީން (މުސްކުޅި ބަންޑާރައިން)ގެ، އައްސުލްޠާން އިބްރާހީމް ނޫރައްދީން (ނޫރައްދީން ބަންޑާރައިން)ގެ، އައްސުލްޠާން މުޙައްމަދު ޝަމްސުއްދީން (3ވަނަ)ގެ، މެދުގޮމަފުޅުގެ، އަންނަބީލް ޙަސަން ޒަރީރުގެ ދަރިކަލެކެވެ. އެހެންކަމުން ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރަކީ ރާއްޖޭގައި ރަސްކަންކުރިކޮޅުތަކުގެ ތެރެއިން ހުރާގޭ ދަރިކޮޅާއި ދިޔަމިގިލި ދަރިކޮޅަށް ވެސް ނިސްބަތްވެވަޑައިގަންނަވާ އަދި ރާއްޖޭގައި އޮތް ސައްޔިދު ދަރިކޮޅުގެ ވެސް ބޭފުޅެކެވެ. 

 

 

ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރު ދިވެހި އަސްކަރިއްޔާގައި 27 މާރިޗު 1994 އިން، 11 އޯގަސްޓް 2009  އަށް 15 އަހަރާއި 4 މަހާއި 16 ދުވަހު ތެދުވެރިކަމާއި އިޚްލާޞްތެރިކަމާއެކު ޤައުމަށް އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. ސިފައިންގެ ޚިދުމަތާ ގުޅިވަޑައިގެންނެވީ ވޮރަންޓް އޮފިސަރ ގްރޭޑް 1ގެ ރޭންކުގައެވެ. ކަމިޝަން ކުރެއްވީ 14 އޮކްޓޫބަރު 1995 ގައެވެ. ލެފްޓިނަންޓް، ފަސްޓް ލެފްޓިނަންޓް، ކެޕްޓަން، މޭޖަރ އަދި ލެފްޓިނަންޓް ކާނަލް ރޭންކުގައި ދިވެހި އަސްކަރިއްޔާގައި ޚިދުމަތް ކުރެއްވި ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރު ދިވެހި އަސްކަރިއްޔާގައި ޚިދުމަތް ކުރެއްވީ އިންޖިނިއަރިންގ ދާއިރާގައާއި، ލޮޖިސްޓިކްސް ދާއިރާގައެވެ. މިގޮތުން ދިވެހި އަސްކަރިއްޔާގެ އިންޖިނިއަރިންގ ސަރވިސް އަދި ފަހުން އިލެކްޓްރިކަލް އެންޑް މެކޭނިކަލް އިންޖިނިއަރސްގެ ޑެޕިއުޓީ ކޮމާންޑިންގ އޮފިސަރުކަމާއި ކޮމާންޑިންގ އޮފިސަރުކަން ކުރެއްވިއެވެ. އަދި އިންޓެގްރޭޓެޑް ހެޑްކްއޯޓަރޒުގެ ޕްރިންސިޕަލް ޑައިރެކްޓަރ ލޮޖިސްޓިކްސް (ޖޭ4) މަޤާމު އަދާކުރެއްވިއެވެ.

ދިވެހި އަސްކަރިއްޔާގައި ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރު ކުރައްވާފައިވާ އިޚްލާޞްތެރި ޚިދުމަތުގައި 9 ޝަރަފުގެ ނިޝާނެއް ހާސިލުކުރައްވާފައިވެއެވެ. އޭގެތެރޭގައި ހިމެނެނީ ސިފައިންގެ ޚިދުމަތުގެ މެޑެލި، ދިގު މުއްދަތެއްގައި ޚިދުމަތް ކުރުމުގެ ކުލަ، އިޚްލާޞްތެރި ޚިދުމަތުގެ ކުލަ، ސިފައިންގެ ޚިދުމަތުގެ ކުލަ، ހުނަރުވެރިކަމުގެ ކުލަ، ކާމިޔާބުގެ ކުލަ، އަދި އަޚުލާޤީ ކުލަ އެއްވަނަ، ދެވަނަ، ތިންވަނަ ފަހަރަށެވެ.