ޖިންސީ އަދި ނަފުސާނީ އަނިޔާގައި ދިވެހި އަންހެނުން

ރާއްޖޭގައި ޖިންސްގެ ތަފާތުކަން މިހާރަށްވުރެ ބޮޑަށް އޮތް ދުވަސްވަރެއް މާޒީއާއެކުވެފައިވެއެވެ. އަންހެނުންނަކީ ނިކަމެތި ބައެއްގެ ގޮތުގައި ރާއްޖޭގައި ބެލުނު ދުވަސްވަރެއް ފާއިތުވެގެން ގޮސްފައިވެއެވެ. މިހާރުވެސް ބައެއް ދިވެހި އާއިލާތަކުގައި ( ދަރިންގެ މެދުގައި ) ޖިންސްގެ ތަފާތުކުރުން ގެންގުޅެއެވެ. އެކަން އެމީހުން އެގެންގުޅެނީ ރާއްޖޭގައި އޮތް ސަގާފަތެއްގެ ސަބަބުންކަމަށްވެދާނެއެވެ. ކިޔެވުމުގެ ފުރުސަތު ހޯދައިދިނުމާއި މަތީ ތަޢުލީމު ހޯދައިދިނުމުގައިވެސް މި ތަފާތު އަދިވެސް ގެންގުޅެއެވެ. ގޭގައި ތައްޔާރުކުރެވޭ މީރު ކާނާއަކީ ފިރިހެން ކުދިން ކައިފައި ބާކީ ހުރިއްޔާ އަންހެން ކުދިންނަށް ލިބޭ އެއްޗެއް ކަމަށް ޤަބޫލުކުރެވޭ މި ސަގާފަތަށް މިހާރުވަނީ ބަދަލުތަކެއް އައިސްފައެވެ.

ދުނިޔޭގައި އަންހެނުންނަށް އިހަނެތިކޮށް ހިތުމާއި އެމީހުންނަށް ޖިންސީ ގޮތުންނާއި ޖިސްމާނީގޮތުން އަނިޔާ ކުރާ ވާހަކައަކީ އާ ވާހަކައެއްނޫނެވެ. އެހެން ނަމަވެސް ދިވެހިރާއްޖޭގައި މިކަންކަން އޮތް ގޮތަށްބަލާއިރު މިއީ ކަންބޮޑުވާންޖެހޭ ހިސާބުގައި އޮތް ސީރިއަސް މައްސަލައެކެވެ. ޑަބްލިޔު އެޗް އޯ އާއި ޔޫއެންޑީޕީ އަދި ޔުނިސެފްގެ އެހީގައި ދިވެހިސަރުކާރުން ކުރެއްވި ސާވޭއެއްގެ ރިޕޯޓެއް 2006 ވަނަ އަހަރުގެ ޑިސެމްބަރ މަހުގެ ތެރޭގައި އާންމު ކުރެއްވިއެވެ. އަންހެނުންގެ ޞިއްޙަތާއި ދިރިއުޅުމުގެ ތަޖުރިބާއާ ބެހޭގޮތުން ފުރަތަމަ ފަހަރަށް ރާއްޖޭގައި ކުރި މި ސާވޭއިން ދައްކާގޮތުގައި ރާއްޖޭގެ 15 އަހަރާއި 49 އަހަރާ ދެމެދުގެ ކޮންމެ 3 އަންހެނުންގެ ތެރެއިން 1 އަންހެނަކީ ޙަޔާތުގައި އެއް ފަހަރު ނަމަވެސް ޖިންސީ ނުވަތަ ޖިސްމާނީ އަނިޔާ ލިބިފައިވާ މީހުންނެވެ. ނުވަތަ ލިބެމުންދާ މީހުންނެވެ.

ދިވެހިރާއްޖޭގައި ހަޔާތުގެ ބައިވެރިން އެމީހުންގެ އަނބިންނަށް އަނިޔާ ކުރަނީ ކިހިނެތް ކޮންގޮތަކަށްހެއްޔެވެ؟ ޖިސްމާނީ ގޮތުން އެމީހުން ދެނީ ކޮން ކަހަލަ އަނިޔާތަކެއްހެއްޔެވެ؟ ގޮއްމުށުން ޖެހުމާއި، ކަރުގައި ހިފުމާއި، އަދި ތަފާތު ވައްތަރުގެ ތަކެތި ބޭނުންކޮށްގެން އަނިޔާ ދިނުމާއި އަލިފާން ޖެއްސުންފަދަ އަނިޔާތައްވެސް މީގެ ތެރޭގައި ހިމެނެއެވެ. މި ސާވޭއިން ދައްކާގޮތުން 15 އަހަރާއި 49 އަހަރާ ދެމެދުގެ ކޮންމެ 5 އަންހެނުންގެ ތެރެއިން އެކަކީ ބައިވެރިޔާގެ ފަރާތުން ޖިންސީ ނުވަތަ ނަފުސާނީ ގޯނާ ލިބިފައިވާ މީހުންނެވެ.

ދިވެހި އަންހެނުންނަށް ކުރިމަތިވެފައިވާ ޖިންސީ ނުވަތަ ނަފުސާނީ އަނިޔާތައް އޮތް މިންވަރަކީ ހައިރާންވާން ޖެހޭހާ އިތުރު މިންވަރެކެވެ. މާބަނޑު އަންހެނުންނަށްވެސް ބޮޑެތި އަނިޔާތަކެއް ދިވެހި މުޖުތަމަޢުން ދެއެވެ. އޭގެ ތެރޭގައި ގޮއްމުށުންނާއި ކޮޅުފައިން ބަނޑުގައި ޖެހުންފަދަ ނުބައި އަމަލުތައް ހިންގާފައިވެއެވެ. 15 އަހަރާއި 49 އަހަރާ ދެމެދުގެ އަންހެނުންގެ ތެރެއިން 6.3 އިންސައްތަ އަންހެނުންނަކީ މާބަނޑު ދުވަސްވަރު އެމީހުންގެ ބައިވެރިޔާގެ ފަރާތުން ޖިންސީ އަދި ނަފުސާނީ އަނިޔާ ލިބިފައިވާ މީހުންނެވެ.

ރާއްޖޭގައި އޮންނަނީ އަންހެނުންނާއި ކުޑަކުދިންނަށް ކުރާ ޖިންސީ ގޯނާ ކުރުންތައް ފޮރުވާ ސަގާފަތެކެވެ. ފިރިން އަނބިންނަށް ކުރާ ޖިސްމާނީ އަނިޔާތައްވެސް އޮންނަނީ ސިއްރުކޮށްފައެވެ. މި ވާހަކަތައް އެންމެ ގާތް މީހުންގެ ކައިރީގައިވެސް ބުނެއެއް ނަހަދައެވެ. މިކަމުގެ ނަތީޖާއަކަށްވެފައިވަނީ މިފަދަ ލާއިންސާނީ އަމަލުތައް ހިންގާ މީހުންނަށް އެގޮތުގައި ކުރިއަށް ދިއުމަށް ހިތްވަރު ލިބުމެވެ. ރާއްޖެއަކީ މާތްވެގެންވާ އިސްލާމްދީނަށް ތަބާވެފައިވާ މުޖުތަމަޢުއެކެވެ. މި މުޖުތަމަޢުގައި މި މިންވަރަށް ފާހިޝް އަމަލުތައް ހިގަމުންދާ ކަމަށް ޤަބޫލުކުރަންވެސް ދައްޗެވެ. ނަމަވެސް މި މުޖުތަމަޢުގައި ޖިންސީ ނުވަތަ ޖިސްމާނީ އަނިޔާތައް ލިބެމުންދާ އަންހެނުންނާއި ކުޑަކުދިންގެ ބޮޑު އާބާދީއެއް އުޅެމުންދާކަން ގަބޫލުކުރަންޖެހެއެވެ.