ޢަބްދުﷲ ސަޢީދު
ދިވެހިންގެ ޚާއްޞަ ސިފަތަކެއް ހުރެއެވެ. އެ ސިފަތަކަށް ދިވެހިއްޔަތު ކިޔަމާ ހިނގާށެވެ. އެއީ ދިވެހިންގެ ތަބީއީ (ފިޒިކަލް) ސިފަތަކާއި، މައުނަވީ (އެބްސްޓްރެކްޓް) ސިފަތަކާއެކުގައެވެ. ދިވެހިންގެ އާންމު އިސްކޮޅާއި ރޫފައާއި ހަމުގެ ކުލައަކީ ތަބީއީ ސިފަތަކެކެވެ. ދިވެހިންގެ ވިސްނުމާއި ފިކުރާއި ޖަޒުބާތާއި ޝުޢޫރުތަކުން ފާޅުވަނީ މައުނަވީ ސިފަތަކެވެ. މިހުރިހާ ސިފަތަކަށް ނުފޫޒު ފޯރުވަނީ ދިވެހިންގެ ޤައުމިއްޔަތާއި ބަދަލުވަމުންދާ ހާލަތެވެ. ދިވެހިންގެ ދީނާއި ބަހާއި އާދަކާދައާއި ސަޤާފަތާއި ތާރީޚެވެ. ޤައުމިއްޔަތަކީ ޤައުމީވަންތަކަމާއި ނިސްބަތްވާ ޤައުމެވެ. ދިވެހިއްޔަތަކީ ދިވެހި ޤައުމިއްޔަތާއި ދިވެހިންވަންތަކަމުގައި ހުންނަ ޚާއްޞަ ސިފަތަކެވެ.
