ފެން

ފެނަކީ ހުރިހާ ދިރުމެއްގެ އަސްލެވެ. ހަމަ އެހެންމެ، ފެނަކީ މާތް ﷲ އިންސާނުންނަށް ދެއްވާފައިވާ ގިނަގުނަ ނިޢްމަތްތަކުގެ ތެރެއިން ވަރަށް އަގުބޮޑު ނިޢުމަތެކެވެ. އިންސާނުންނާއި ދިރުން ހުރި ކޮންމެ އެއްޗެއް މާތް ﷲ ލައްވާފައިވަނީ ފެނުންނެވެ. ފެނަކީ ޠާހިރު އަދި އެހެން އެއްޗެތި ޠާހިރު ކުރުވާ، ޠާހިރު ކުރުމަށް ބޭނުންކުރެވޭ އެއްޗެކެވެ. ﷲ މިންވަރު ކުރައްވާފައިވާ އެހެނިހެން ނިޢުމަތްތަކެކޭ އެއްފަދައިން ފެނަކީވެސް ވަކި މިންވަރަކަށް ކަނޑައަޅުއްވާފައިވާ ނިޢުމަތެކެވެ. ފެން އުފެދިފައިވަނީ އޮކްސިޖަނާއި، ހައިޑްރޯޖަން އެކުލެވިގެންނެވެ.

ސިފައިންގެ ފެމެލީ އެސޯސިއޭޝަން، ސިފަމާ އާއި މޯލްޑިވްސް މިލިޓަރީ ވެޓަރަންސް، މޯލްވެޓްސް

ޢަބްދުﷲ ސަޢީދު

"ސިފަމާ"

----- 

"ސިފައިންގެ ފެމެލީ އެސޯސިއޭޝަން" (ސިފަމާ) އާއި، ސިފައިންގޭގައި ކުރިން ޚިދުމަތް ކުރައްވާފައިވާ އިސް ޚިދުމަތްތެރިންގެ ޖަމްއިއްޔާ "މޯލްޑިވްސް މިލިޓަރީ ވެޓެރަންސް" (މޯލްވެޓްސް) އިފްތިތާޙުކުރީ 2012 ޑިސެންބަރު 04 ވަނަ ދުވަހުގެރޭ ކަޅުތުއްކަލާކޮށީގައި ބޭއްވި ޚާއްޞަ ރަސްމިއްޔާތެއްގައެވެ. މި ރަސްމިއްޔާތު ޝަރަފުވެރިކޮށްދެއްވީ ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު ވަޙީދު ޙަސަން މަނިކުގެ ދެކަނބަލުންނެވެ. މި ރަސްމިއްޔާތުގައި ރާއްޖޭގެ ނާއިބު ރައީސް އަންނަބީލް މުޙައްމަދު ވަޙީދުއްދީން (ޑީން) ބައިވެރިވެވަޑައިގެން ވާހަކަފުޅު ދެއްކެވިއެވެ.

މި ޚާއްޞަ ރަސްމިއްޔާތުގަައި ސިފައިންގެ ފެމެލީ އެސޯސިއޭޝަން (ސިފަމާ) އިފްތިތާހުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން އިލްޙާމް ޙުސައިނެވެ. މޯލްޑިވްސް މިލިޓަރީ ވެޓެރަންސް (މޯލްވެޓްސް) އިފްތިތާޙްކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު ވަޙީދު ޙަސަން މަނިކެވެ.

     

 ސިފައިންގެ ފެމެލީ އެސޯސިއޭޝަން (ސިފަމާ) ހޯމް މިނިސްޓްރީގައި ރަޖިސްޓްރީ ކޮށްފައިވަނީ 2012 ސެޕްޓެންބަރު 12 ވަނަ ދުވަހުއެވެ. ސިފަމާގެ ހިންގާކޮމެޓީގެ އިންތިޚާބު ބާއްވައި، އިފްތިތާޙު ކުރުމުގެ ކަންތައްތައް ކުރިއަށް ގެންދިއުމަށް އެކުލަވާލެއްވި ކޮމެޓީގެ ޗެއަރމަންއަކީ ކާނަލް ޢަލީ ޒުހައިރެވެ. އެހިސާބުން ފެށިގެން ސިފަމާއަށް މެމްބަރުން ހޯދުމަށާއި ހިންގާ ކޮމެޓީގެ އިންތިޚާބުގެ ކަންތައްތައް ކުރިއަށް ގެންދިއުމަށް ކެޕްޓަން ޙުސައިން ޢަލީގެ ޗެއަރމަން ކަމުގެ ދަށުން އިންތިޚާބީ ކޮމެޓީއެއް އެކުލަވާލައި މަސައްކަތް ފެށިއެވެ. ހަމައެއާއެކު ސިފަމާ އިފްތިތާޙު ކުރުމުގެ ޙަފްލާގެ އެންމެހާ ކަންތައްތައް ކުރިއަށް ގެންދިއުމަށް ކެޕްޓަން ޢަލީ މަނިކުގެ ޗެއަރމަން ކަމުގެ ދަށުން ކޮމެޓީއެއް އެކުލަވާލައި މަސައްކަތް ފެށިއެވެ.

ސިފަމާގެ ލީފްލެޓް ތައްޔާރުކޮށް، ސިފައިން ދިރިއުޅޭ ބަނޑޭރިކޮށީގެ ގޭބިސީތަކަށާއި ވިލިމާލެ ފުލެޓްގެ ގޭބިސީތަކަށް "އޮޅިން އޮޅިއަށް" ކެމްޕޭނެއް ފެއްޓިއެވެ. އަދި ޔުނިޓްތަކުގެ އެންލިސްޓެޑް ލީޑަރުން މެދުވެރިކޮށް ސިފައިން ހޭލުންތެރިކުރަން ފެށިއެވެ. ހުރިހާ އޮފިސަރުންނަށް ސިޓީއަކުން މަޢުލޫމާތު އެރުވުމުގެ އިތުރުން ޔުނިޓުތަކުގެ ކޮމާންޑަރުންނާއި ޑެޕިއުޓީ ކޮމާންޑަރުން އެކްޓިންގ ކޮމާންޑް ސާރޖަންޓް މޭޖަރުންނާ ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު މުޙައްމަދު ބައްދަލުކުރައްވައި ސިފަމާއާ ބެހޭ މަޢުލޫމާތު ދެއްވިއެވެ. އޭރުއައީ މެމްބަރޝިޕަށް އެދި ގިނަ އަދަދެއްގެ ބަޔަކު ފޯމް ފުރަމުންނެވެ. އެހިސާބުން ހިންގާ ކޮމެޓީގެ އިންތިޚާބު އިޢުލާންކުރިއެވެ. ހިންގާ ކޮމެޓީގެ އިންތިޚާބަށް ކުރިމަތިލެއްވި ފަރާތްތަކުގެ ތެރެއިން ސާރވިސް ކޯރ ގެ އޮފިސަރ ކޯރ އަށް ނިސްބަތްވާ ދާއިރާ ފިޔަވާ ކޮންމެ އިންތިޚާބީ ކޮންމެ މަޤާމަކަށްވެސް ކުރިމަތިލައްވާފައިވަނީ އެންމެ ކެންޑިޑޭޓެކެވެ. މިދާއިރާއިން ކުރިމަތިލެއްވި ދެބޭފުޅުންގެ ތެރެއިން އެއް ބޭފުޅަކު ނަން އަނބުރާ ގެންދެވުމުން ވޯޓް ނުލައި ސިފަމާގެ ހިންގާ ޤަވާޢިދާ އެއްގޮތަށް އެފަރާތްތައް އިންތިޚާބުވީއެވެ. ހިންގާ ކޮމެޓީ އިންތިޚާބު ވެގެންދިޔައިރު މެރިން ކޯރ ގެ ވޮރަންޓް އޮފިސަރ ކޯރ އަށް ނިސްބަތް މެމްބަރަކު އިންތިޚާބަށް ކުރިމަތިލާފައިނުވާތީ ފުރަތަމަ ދައުރުގެ ހިންގާ ކޮމެޓީގެ މަސައްކަތް ފެށިގެންދާނީ ހިންގާ ކޮމެޓީގެ 19 މެމްބަރުންނާއެކުގައެވެ.

ސިފަމާގެ ހިންގާ ކޮމެޓީ

1-      ޗެއަރޕާސަން: ޚަދީޖާ ނަޢީމް

2-      ވައިސް ޗެއަރޕާސަން: ޝެލްވިޔާ ޙަމީދު

3-      ސެކްރެޓަރީ ޖެނެރަލް ފާޠިމަތު ފިރާޝާ

4-      ޚަޒާންދާރު މަރިޔަމް ޝީނީޒް ޝާކިރު

5-      މުޝީރު: ޢާއިޝަތު މުޙައްމަދު ސަމީރު

6-      އިތުރު މެމްބަރު: އިލްހާނާ ނިޒާރު (ކޯސްޓްގާޑް / އޮފިސަރ ކޯރއަށް ނިސްބަތްވާ)

7-      އިތުރު މެމްބަރު: ޢާއިޝަތު ބުޝްރީ  (ކޯސްޓްގާޑް / ވޮރަންޓް އޮފިސަރ ކޯރއަށް ނިސްބަތްވާ)

8-      އިތުރު މެމްބަރު: ޒުލްފާ މުޙައްމަދު  (ކޯސްޓްގާޑް / އެންލިސްޓެޑް ކޯރއަށް ނިސްބަތްވާ)

9-      އިތުރު މެމްބަރު: ފާތިމަތު ޙުސައިން  (ކޯސްޓްގާޑް / އެންލިސްޓެޑް ކޯރއަށް ނިސްބަތްވާ)

10-  އިތުރު މެމްބަރު: މަރިޔަމް ރަޝީދާ  (ކޯސްޓްގާޑް / އެންލިސްޓެޑް ކޯރއަށް ނިސްބަތްވާ)

11-  އިތުރު މެމްބަރު: މަރިޔަމް ޝަރީފް (ސަރވިސް ކޯރ / އޮފިސަރ ކޯރއަށް ނިސްބަތްވާ)

12-  އިތުރު މެމްބަރު: އައިމިނަތު ޙަމީދު  (ސަރވިސް ކޯރ / ވޮރަންޓް އޮފިސަރ ކޯރއަށް ނިސްބަތްވާ)

13-  އިތުރު މެމްބަރު: އައިމިނަތު ރިންޒީ  (ސަރވިސް ކޯރ / އެންލިސްޓެޑް ކޯރއަށް ނިސްބަތްވާ)

14-  އިތުރު މެމްބަރު: ޝަހީމާ މުޙައްމަދު  (ސަރވިސް ކޯރ / އެންލިސްޓެޑް ކޯރއަށް ނިސްބަތްވާ)

15-  އިތުރު މެމްބަރު: އައިމިނަތު ޢަބްދުﷲ  (ސަރވިސް ކޯރ / އެންލިސްޓެޑް ކޯރއަށް ނިސްބަތްވާ)

16-  އިތުރު މެމްބަރު: ފާޠިމަތު އިނާޔާ (މެރިން ކޯރ / އޮފިސަރ ކޯރއަށް ނިސްބަތްވާ)

17-  އިތުރު މެމްބަރު: ޠޯމާ ޢަބްދުއްސަމަދު  (މެރިން ކޯރ / އެންލިސްޓެޑް ކޯރއަށް ނިސްބަތްވާ)

18-  އިތުރު މެމްބަރު: އައިމިނަތު ޞަބީހާ  (މެރިން ކޯރ / އެންލިސްޓެޑް ކޯރއަށް ނިސްބަތްވާ)

19-  އިތުރު މެމްބަރު: އައިމިނަތު ތައުމާ  (މެރިން ކޯރ / އެންލިސްޓެޑް ކޯރއަށް ނިސްބަތްވާ)

·         ހިންގާކޮމެޓީގެ މެރިންކޯރ / ވޮރަންޓް އޮފިސަރ ކޯރ ދާއިރާއަށް ބޭފުޅަކު ކުރިމަތިލާފައި ނުވާތީ އެގޮޑިއަށް ބޭފުޅަކު އިންތިޚާބު ކުރެވިފައެއް ނުވެއެވެ.

ސިފަމާގެ މަޤްޞަދުތައް:

1-      ސިފައިންގެ ޤައުމީ ވާޖިބު އަދާކުރުމުގައި ސިފައިންގެ އާއިލާތަކުގެ މުޙިއްމު ދައުރާއި ހިއްސާ އަދި ގުރުބާނީ ފާހަގަކުރުން.

2-      ސިފައިންގެ ޢާއިލާތަކުގެ މެދުގައި އެކުވެރިކަމާއި އެއްބައިވަންތަކަން ދިރުވާއާލާކުރުން

3-      ސިފައިންގެ ޢާއިލާތަކަށް ބޭނުންވާ އިނާޔަތްތަކާއި ރައްކާތެރިކަން ހޯދައިދިނުމުގައި އެހީތެރިވެދީ، ޢާއިލާތައް ބާރުވެރިކުރުވުން

4-      ސިފައިންގެ ޢާއިލާތައް ޙިމާޔަތްކޮށް، ސިފައިންގެ ޚިދުމަތާމެދު ޢާންމުރައްޔިތުންގެ މެދުގައި އިޙްތިރާމް އުފެއްދުން.

5-      ސިފައިންގެ ޢާއިލާތަކުގައި ދީނީ އަދި ޤައުމީ ރޫޙް އާލާކުރުމާއި އަދަބީ ، ސަޤާފީ، އަދި ފަންނުވެރިކަން ކުރިއަރުވާ އާލާކުރުން

6-      ކުޅިވަރު ތަރައްޤީކޮށް ކުރިއެރުވުމާއި ޤައުމީ އަދި ބައިނަލް އަޤްވާމީ މުބާރާތްތަކުގައި ތަމްސީލު ކުރުން

7-      ސިފައިންގެ ޢާއިލާތަކަކީ ދުޅަހެޔޮ އަދި ފުދުންތެރިކަމާއި އަމާންކަމާއެކު ދިރިއުޅޭ ޢާއިލާތަކެއްގެ ގޮތުގައި ހެދުން

8-      ސިފައިންނާއި ސިފައިންގެ ޢާއިލާތަކާއި ޢާންމުރައްޔިތުންނާ އޮންނަ ގުޅުން ބަދަހިކުރުން

9-      ޢާއިލީ ގުޅުންތައް ބަދަހިކޮށް، އިޖްތިމާޢީ ގުޅުންތައް ހަރުދަނާކުރުން

މޯލްވެޓްސް

----------

ދިވެހިރާއްޖޭގެ ޤައުމީ ދިފާޢީ ބާރުގައި އަގުހުރި ޚިދުމަތްތަކެއް ކުރައްވައި، ޝަރަފުވެރިކަމާއެކު ޚިދުމަތުން ވަކިވެވަޑައިގެންފައިވާ "ދިވެހި އަސްކަރު އިސްޚިދުމަތްތެރިން" ގެ މައްޗަށް އެކުލެވޭ މޯލްޑިވްސް މިލިޓަރީ ވެޓްރަންސް (މޯލްވެޓްސް) ރަޖިސްޓްރީ ކުރެވުނީ 2012 ނޮވެމްބަރު 25 ވަނަ ދުވަހުއެވެ. މޮޓޯއަކީ "ޚިދުމަތުގައި ދެމިތިބޭނަން" (In Service We Remain) އެވެ. މި އެސޯސިއޭޝަން ރަޖިސްޓްރީކުރުމަށް ހޯމް މިނިސްޓްރީއަށް ހުށަހެޅުއްވުމަށްފަހު އެސޯސިއޭޝަންގެ ދެ މުއައްސިސުން ކަމުގައިވާ ޗީފް އޮފް ޑިފެންސް ފޯސް އާއި ވައިސް ޗީފް އޮފް ޑިފެންސް، ސިފައިންގެ ޚިދުމަތުން ޝަރަފުވެރިކަމާއެކު ވަކިވެވަޑައިގެންފައިވާ ބޭފުޅުންގެ ތެރެއިން އޮފިސަރުންނާ ބައްދަލުކޮށްލެއްވުމަށް ނޮވެމްބަރު 24 ވަނަ ދުވަހު ބައްދަލުވުމެއް ބޭއްވެވިއެވެ. މި ބައްދަލުވުމުގައި މޯލްވެޓްސްއާ ބެހޭ މަޢުލޫމާތު އެބޭފުޅުނަށް ދެއްވައި އެސޯސިއޭޝަންގެ ހިންގާ ޤަވާޢިދާއި އެސޯސިއޭޝަނާބެހޭ މަޢުލޫމާތު ހިމެނޭ ލީފުލެޓް ހަވާލުކުރެއްވިއެވެ.

ކުރިން ސިފައިންގޭގައި ޚިދުމަތްކުރައްވާފައިވާ ވަރަށް ސީނިއަރ އޮފިސަރުންވެސް ބައިވެރިވެވަޑައިގެންނެވި މި ބައްދަލުވުމުގައި ވަރަށް ފުޅާދާއިރާއެއްގައި މޯލްވެޓްސް އާމެދު މަޝްވަރާކުރެއްވުމަށްފަހު ނިންމެވީ ހަމަޖެހިފައިވާ ގޮތަށް ސިފައިންގެ ފެމެލީ އެސޯސިއޭޝަން އިފްތިތާޙުކޮށް، މިއަހަރުގެ ނަޞްރުގެ ދުވަސް ކުލަގަދަކޮށް ފާހަގަކުރުމަށް ކުރެވުނު މަސައްކަތްތަކާއި ހިންގުނު ހަރަކާތްތަކުގައި ބައިވެރިވި ފަރާތްތަކުގެ އަގުވަޒަންކުރުމަށް ބާއްވާ ރަސްމިއްޔާތުގައި ނޮވެމްބަރު 28 ގައި މި އެސޯސިއޭޝަންވެސް އިފްތިތާޙު ކުރުމަށެވެ.

މޯލްވެޓްސްގެ ފުރަތަމަ ދައުރުގެ އިންތިޚާބުގެ ކަންތައްތައް ނިމެންދެން، ވަގުތީގޮތުން އެސޯސިއޭޝަން ހިންގުމަށް އިސް ޚިދުމަތްތެރިންގެ ލަފާފުޅާއެކު މުއައްސިސުން 11 މެމްބަރުންގެ މައްޗަށް އެކުލެވޭ އިންޓްރިމް ކޮމެޓީއެއް އެކުލަވާލެއްވިއެވެ. އަދި އެކޮމެޓީން ބައްދަލުވުމެއް ބާއްވަވާ ވަގުތީ ހިންގާ ކޮމެޓީގެ މަޤާމުތަކަށް އޭގެތެރެއިން މެމްބަރުން ހަމަޖެއްސުމަށް ނިންމެވިއެވެ. ނޮވެމްބަރު 25 ވަނަދުވަހުގެރޭ ބީކޭ ކޮންފަރެންސްހޯލް-1 ގައި ބޭއްވި އިންޓްރިމް ކޮމެޓީގެ ފުރަތަމަ ބައްދަލުވުމުން ވަގުތީ ހިންގާ ކޮމެޓީވަނީ އެކުލަވާ ލައްވާފައެވެ. ވަގުތީ ހިންގާ ކޮމެޓީ އެކުލަވާލެއްވިއިރު މޯލްވެޓްސްގެ އިންތިޚާބީ ހިންގާ ކޮމެޓީގައި އެގްޒެކެޓިވް މެމްބަރުންގެ ގޮތުގައި އިންތިޚާބުކުރެވޭ އަދަދު ފަހަކުން ހަތަކަށްވަނީ އިތުރުކޮށްފައެވެ. 

ވަގުތީ ހިންގާ ކޮމެޓީ

1-      މޯލްވެޓްސް ކޮމާންޑަރ މޭޖަރ ޖެނެރަލް (ރިޓަޔަރޑް) މުޙައްމަދު ޒާހިރު

2-      މޯލްވެޓްސްގެ ޑެޕިއުޓީ ކޮމާންޑަރ ކާނަލް (ރިޓަޔަރޑް) ޝައުކަތު އިބްރާހީމް

3-      އޮޕަރޭޝަންސް އޮފިސަރ ލެފްޓިނަންޓް ކާނަލް (ރިޓަޔަރޑް) އިބްރާހީމް އަފްޒަލް

4-      ފައިނޭންޝަލް އޮފިސަރ ބްރިގޭޑިއަރ ޖެނެރަލް (ރިޓަޔަރޑް) އަޙްމަދު ނަޢީމް މުޙައްމަދު

5-      އިތުރު މެމްބަރު: ކާނަލް (ރިޓަޔަރޑް) އާދަމް އިބްރާހީމް މަނިކު (ބިލާލް)

6-      އިތުރު މެމްބަރު: ކާނަލް (ރިޓަޔަރޑް) އަޙްމަދު ޒާހިރު

7-      އިތުރު މެމްބަރު: ލެފްޓިނަންޓް ކާނަލް (ރިޓަޔަރޑް) އިބްރާހީމް ރަޝީދު

8-      އިތުރު މެމްބަރު: ލެފްޓިނަންޓް ކާނަލް (ރިޓަޔަރޑް) އަޙްމަދު ޒަރީރު

9-      އިތުރު މެމްބަރު: މޭޖަރ (ރިޓަޔަރޑް) ޙުސައިން ޝާކިރު

10-  އިތުރު މެމްބަރު ރިޓަޔަރޑް، ކެޕްޓަން ޙުސައިން ޝާމް

11-  އިތުރު މެމްބަރު: ރިޓަޔަރޑް ފަސްޓްލެފްޓިނަންޓް ޢަލީ ރިޔާޒް

މޯލްވެޓްސްގެ މަޤްޞަދުތައް:

1-      ޚިދުމަތުގައި ދެމިތިބި ސިފައިންނާ ޝަރަފުވެރިކަމާއެކު ސިފައިންގެ ޚިދުމަތުން ވަކިވާ ފަރާތްތަކުގެ މެދުގައި ބަދަހި ގުޅުމެއް ޤާއިމުކޮށް ދެމެހެއްޓުން؛

2-      އިސްޚިދުމަތްތެރިންނަކީ ވަރަށް އަގުހުރި ޚިދުމަތްތަކެއް ދިގު މުއްދަތެއްގައި ދިވެހި ޤައުމަށާއި އަސްކަރިއްޔާއަށް ކޮށްދީފައިވާ ބަޔަކަށް ވީހިނދު، އެފަރާތްތަކުގެ ޚިދުމަތުގެ އަގުވަޒަން ކުރުން؛

3-      އިސްޚިދުމަތްތެރިންނަކީ ޚާއްޞަ ތަމްރީން ތަކަކާއި ސިފަތަކެއް ލިބިފައިވާ ސިފަވަންތަބަޔަކަށް ވީހިނދު އެސިފަތައް ދިވެހި މުޖުތަމަޢުގައި ދަމަހައްޓާ ޝަރަފާއި އިއްޒަތާއެކު އަބުރުވެރި ދިރިއުޅުމެއް ދެމެހެއްޓުން؛

4-      ސިފައިންގެ ޤައުމީ ވާޖިބު އަދާކުރުމަށްފަހު ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކުގެ މުހިއްމު ދައުރު ފުޅާކޮށް ހަރުދަނާކުރުން؛

5-      ސިފައިންނާއި، ސިފައިންގެ އާއިލާތަކާއި އަދި ޝަރަފުވެރިކަމާއެކު ސިފައިންގެ ޚިދުމަތުން ވަކިވާފަރާތްތަކާއި، އެފަރާތްތަކުގެ އާއިލާތަކުގެ މެދުގައި އެކުވެރިކަމާއި އެއްބައިވަންތަކަން ދިރުވާއާލާކުރުން؛

6-      ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކުގެ ޢާއިލާތަކަށް ބޭނުންވާ އިނާޔަތްތަކާއި ރައްކާތެރިކަން ހޯދައިދިނުމުގައި އެހީތެރިވެދީ، ޢާއިލާތައް ބާރުވެރިކުރުވުން؛

7-      ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކާއި އެފަރާތްތަކުގެ ޢާއިލާތައް ޙިމާޔަތްކޮށް ޢާންމު ރައްޔިތުންގެ މެދުގައި އިޙްތިރާމް ދެމެހެއްޓުން؛

8-      ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކުން ރައްޔިތުންގެ ލާބަޔާ މަންފާއަށްޓަކައި އިޖުތިމާއީ މަސައްކަތްތައް ރާވާ ހިންގުން؛

9-      ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކާއި އެފަރާތްތަކުގެ ޢާއިލާގެ މެންބަރުންގެ މެދުގައި ދީނީ އަދި ޤައުމީ ރޫޙް އާލާކުރުމާއި އަދަބީ ، ސަޤާފީ، އަދި ފަންނުވެރިކަން ކުރިއަރުވާ އާލާކުރުން؛

10-  ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކުގެ ޢާއިލާތަކަކީ ދުޅަހެޔޮ އަދި ފުދުންތެރިކަމާއެކު އަބުރުވެރި ދިރިއުޅުމެއް އުޅެވޭނެބަޔަކަށް ހެދުމަށް އެހީތެރިވެދިނުން؛

11-  ސިފައިންގެ ޚިދުމަތުން ޝަރަފުވެރިކަމާއެކު ވަކިވާ ފަރާތްތަކާއި އެފަރާތްތަކުގެ ޢާއިލާތައް އަމާންކަމާއެކު ދިރިއުޅޭ ބައެއްގެ ގޮތުގައި ހެދުމަށް މަސައްކަތް ކުރުމާއި، ޢާއިލީ ގުޅުމާއި އިޖުތިމާޢީ ގުޅުން ބަދަހިކޮށް ދެމެހެއްޓުމަށް އެހީތެރިވެދިނުން؛

12-  ސިފައިންގެ ކުރިއެރުމާއި ތަރައްޤީއަށް ފަންނީ އަދި ޕްރޮފެޝަނަލް ލަފާއާއި މަޝްވަރާ ދިނުން؛

13-  ސިފައިންގެ ތަޞައްވުރު ރަނގަޅުކުރުމަށް މަސައްކަތް ކުރުމާއި، ސިފައިންގެ ޚިދުމަތަކީ ރައްޔިތުން ބަލައިގަންނަ މަޤްބޫލު ޚިދުމަތަކަށް ހެދުމަށް މަސައްކަތް ކުރުން.

14-  ސިފައިންގެއިން ޝަރަފުވެރިކަމާއެކު ޚިދުމަތުން ވަކިވާ ފަރާތްތައް، މަދަނީ ދިރިއުޅުމަކަށް އަހުލުވެރިކުރުމަށް ޕްރޮގްރާމްތައް ހިންގައި އެފަރާތްތަކަށް އެހީތެރިކަން ފޯރުކޮށްދިނުން.

ނޮވެންބަރު ތިނެއްގެ ބާޣީ ލީޑަރ ހާޖަރާގޭ ޢަބްދުﷲ ލުުޠުފީ (ބާބު 1)

1988 ނޮވެންބަރު ތިނެއްގެ ޢުދުވާނީ ޙަމަލާ ޕްލޯޓް ޖަމާޢަތާގުޅިގެން ދިނުމުގައި އިސް މީހެއްގެ ގޮތުގައި ހަރަކާތްތެރިވި ހެންވޭރު ހާޖަރާގޭ ޢަބްދުﷲ ލުޠުފީގެ ބައްޕައަކީ އައްޑުއަތޮޅު ހިތަދޫ އައްޝައިޚް އިބްރާހީމް ލުޠުފީ (އައްޑޫ ތުއްތީދީ)ގެ އަލްއުސްތާޛު މުޙައްމަދު އިބްރާހީމް ލުޠުފީއެވެ. މަންމައަކީ ހެންވޭރު ހާޖަރާގޭ ޢައިޝަތު ފަރީދާ (ހާޖަރާގޭ ސިއްތި) އެވެ. ލުޠުފީއަކީ މުޙައްމަދު އިބްރާހީމް ލުޠުފީއާއި ހާޖަރާގޭ ސިއްތިގެ ދޮށީ ފިރިހެން ދަރިފުޅެވެ.

ނ. އަތޮޅުގެ ކުރު ތާރީޚް

މަނަދޫ ޕްރައިމަރީ ސްކޫލް ރައީސުލްޖުމްހޫރިއްޔާ އަލްއުސްތާދު މައުމޫން ޢަބްދުލް ޤައްޔޫމް ހުޅުވައިދެއްވީ 01 މާޗް 1979 ގައި

·         01 ނޮވެމްބަރު 1959: ޒަމާނުއްސުރެ ނ. އަތޮޅުގައި ވެރިކަން ކުރަމުންއައި މަނަދޫން އެއަތޮޅު ހޮޅުދޫއަށް ނ. އަތޮޅު އޮފީސް ބަދަލު ކުރެއްވި.

·         28 ނޮވެމްބަރު 1959: ނ. އަތޮޅުވެރކަމުގައި ހުންނެވި ކުޑިގޭ މުޙައްމަދު ޢަބްދުއްލަޠީފް ކުއްލި އަކަށް އަވަހަރާވި. އެމަނިކުފާނު އަވަހާރަވީ ނ. ހޮޅުދޫގައި.

·         20 ޑިސެމްބަރު 1960: ނ. އަތޮޅު އޮފީސް އެއަތޮޅު ހޮޅުދޫން ނ. މަނަދޫއަށް އަނބުރާ ބަދަލު ކުރެއްވި.

މަނަދޫ ކަމަނަ ދައިތަ: ކަމަނަ މާމަ

މަނަދޫ ކަމަނަދައިތަ: އުމުުރުން 108 އަހަރުގައި (1979)

މަނަދޫ ކަމަނަ ދައިތަ ނުވަތަ ކަމަނަ މާމަގެ ބައްޕައަކީ މަނަދޫ ދޮންޢަލީ ތަކުރުފާނެވެ. އެއީ ރަދުންގެ ލަޝްކަރުގައި ހިމެނޭ ހަގުބޭކަލުންގެ ތެރޭގައި މަތި ފެންވަރުގައި އުޅުއްވި ބޭކަލެކެވެ. ކަމަނަ ދައިތަގެ މަންމައަކީ ވަޑި މޫސާފުޅުގެ ދަލޭކާފުޅެވެ. ވަޑި އާއިލާއަކީ މާލޭގައި މަޝްހޫރު އާއިލާއެކެވެ.  ކަމަނަ ދައިތަގެ ބައްޕަ ވަޑި މޫސާފުޅުވަނީ ހެންވޭރު ބަންޑާރަ އެދުރުގެ މަޤާމު އަދާކުރައްވާފައެވެ. ކަމަނަ ދައިތަ އުފަންވީ 1871 ވަނަ އަހަރުގައެވެ. އޭރު ރާއްޖޭގެ ތަޚްތުގައި އިންނެވީ އައްސުލްޠާން މުޙައްމަދު މުއީނުއްދީން (2 ވަނަ) އެވެ. ކަމަނަ ދައިތަގެ އުމުރުން ދެ މަހުގައި މަންމަ ނިޔާވިއެވެ. ކަމަނަ ދައިތަ ބަލާ ބޮޑުކުރީ މަނަދޫ ދޮންޢަލީ ތަކުރުފާނުގެ އާއިލާގެ މީހުންނެވެ. ބައްޕަ ފަރާތުގެ ބޮޑު ބޭބެއާއި ބޮޑު ދައިތައާ ދެބެންނެވެ. 

"ހަފްތާ ޚަބަރު": ރާއްޖޭގެ ސްކޫލަކުން ރަޖިސްޓްރީ ކޮށް، ޗާފްކޮށްގެން ނެރުނު ފުރަތަމަ ނޫސް

ހަފްތާ ޚަބަރު: ޗާޕްކޮށްގެން ނެރުނު ފުރަތަމަ އަދަދުގެ ހެޑަރ

ހަފްތާ ޚަބަރަކީ ހަފްތާއަކު އެއް ފަހަރު ނެރެމުން ދިޔަ ހަފްތާ ނޫހެކެވެ. މަނަދޫގައި ހުންނަ ނ. އަތޮޅު އަތޮޅު މަދަރުސާއިން މި ނޫސް ފުރަތަމަ ނެރެންފެށީ 28 އޭޕްރީލް 1984 ގައެވެ. އޭރު އެއީ އަތުން ލިޔެގެން ނެރޭ ނޫހެކެވެ. މިގޮތުގައި މެދު ނުކެޑި އެއް އަހަރު ދުވަހު މި ނޫސް ނެރުނެވެ. އޭރު ނޫސް ކިޔަން ބޭނުންވާ ފަރާތްތައް އިތުރުވުމުން ބައެއް އަދަދުތައް ތިން ކޮޕީ ނުވަތަ ފަސްކޮޕީ އަދި ހަކޮޕީވެސް އަތުން ލިޔެގެން ނެރެމުން ދިޔައެވެ. އޭރު އެ މަސައްކަތަކީ ސްކޫލުގެ ދަރިވަރުންނާއި ޓީޗަރުންނާއި ސްކޫލް ހިންގަވަން ތިއްބެވި ވެރިން ބައިވެރިވެގެން ޓީމެއްގެ ގޮތުގައި ކުރަމުންދާ ބޮޑު މަސައްކަތެކެވެ. ޚާއްޞަ މަސައްކަތެކެވެ. ބުރަ މަސައްކަތެކެވެ.

"ސިފަވަރު"ގެ ނަން ހުށަހެޅީ އަޅުގަނޑު

ސިފަވަރުގެ ދިދަ ޕޯސްޓް

  ދިވެހިރާއްޖޭގެއަށް އަލަށް މިއަދު އިތުރުވެގެންދިޔަ ރަށަކީ "ސިފަވަރު" އެވެ. މިއީ ދިވެހިރާއްޖޭގެ ޤައުމީ ދިފާޢީ ބާރުން މާލެއަތޮޅު އުތުރު ތިލަފަޅުގައި ހިއްކި ރަށެކެވެ. އެރަށް ހިއްކައި އެތަނަށް މިއަދު (21 މާޗް 2014 ވީ ހުކުރު ދުވަހު) ނަންދެއްވައި އެރަށް ދިވެހިރާއްޖޭގެ ރަށްތަކުގެ ތެރެއަށް އިތުރު ކުރައްވައިފިއެވެ. މި މުހިންމު ރަސްމިއްޔާތު ޝަރަފުވެރިކޮށްދެއްވައި، މި ރަށުގެ ނަން އިޢުލާންކޮށް ދެއްވީ ނުވަތަ ރަށުގެ ނަން ކަޝްފު ކޮށްދެއްވީ ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެމަތީ ވެރިޔާ އަލްފާޟިލް ޢަބްދުﷲ ޔާމީން ޢަބްދުލް ޤައްޔޫމެވެ. 

މަނަދޫގައި ހުޅުވި ސިފައިންގެ މަރުކަޒު – މިހާރުގެ މަނަދޫ ޕޮލިސް ސްޓޭޝަން

މަނަދޫ ޕޮލިސް ސްޓޭޝަން (2006)

ނ. މަނަދޫގައި ހުޅުވި ސިފައިންގެ މަރުކަޒު "އެންއެސްއެސް ނ. މަނަދޫ" ހުޅުވީ 1999 ޖުލައި 01 ވަނަ ދުވަހުއެވެ. ސިފައިންނާއި ފުލުހުންގެ ޚިދުމަތް ދިނުމަށްޓަކައި ނ. އަތޮޅުގައި ހުޅުވުނު ފުރަތަމަ މަރުކަޒު ހުޅުވައި ދެއްވީ ސިފައިންގެ އޭރުގެ ލެފްޓިނަންޓް ޙުސައިން ޝާކިރެވެ. ހެނދުނު ބޭއްވި އެ ރަސްމިއްޔާތުގައި ބައިވެރިވުމުގެ ފުރުސަތު އަޅުގަނޑަށް ލިބުނެވެ. އޭރު އަޅުގަނޑު ރަށުގައި ހުރީ ޗުއްޓީއެއްގައެވެ.

ރޯދަ ވީއްލުމަށްޓަކައި ސިފައިންޖަހާ "ނާބަ ބަޑި"

އާކޯއްޓޭ މަތިގެ: ސިފައިންގެ ފުރަތަމަ ހެޑްކްއޯޓާރޒް

ނާބަބަޑިއަކީ ރަމަޟާންމަހު އިރު އޮއްސިއްޖެކަން އެންގުމަށް މާލޭގައި ސިފައިން ޖަހައި އުޅުނު ބަޑިއެކެވެ.  ހަރޯދައިގެ ދުވަސްތަކުގައިވެސް މި ބަޑިޖަހާ އުޅުނެވެ. ބޮޑު ދެހިތީގައި ނާބަ ފަށަންވީމާ ޖަހައި އުޅުނު ތިން ބަޑިއަށްވެސް ނާބަބަޑި ޖެހުމޭ ކިޔައެވެ. ނާބައަކީ މަޣްރިބު ނަމާދަށް މާލޭ ހުކުރު މިސްކިތު މުންނާރުން ބަންގި ގޮވާ ނިމުމާއި ވިދިގެން ނާބުސްޚާނުން ޖަހައި އުޅުނު ބެރެކެވެ. ރަސްމީ ބެރުޖެހުން އޮންނަ ރޭރެއަށް ނާބަ ޖަހައި އުޅުނީ އެބެރުގެ ފަހުގައެވެ. ބޮޑު ދެހިތީގައި ޖަހާއުޅުނީ ހިތިގެ ދޮށުގައެވެ. ރަޖަބު، ރަމްޟާން، ޝައްވާލު މި މަސްމަހަށް ހަނދުބަލާރޭރޭ މި ބެރުޖަހައި އުޅުނީ ބަޑިޖެހުމުގެ ފަހުގައި ނުވަތަ ހަނދު ފެނުނުކަން އެގުނީމައެވެ.

ނ. އަތޮޅުގެ ތާރީޚް: މަނަދޫގައި ޤައުމީ ދުވަސް ޤައުމީ ފެންވަރުގައި ފާހަގަކުރުން

މަނަދޫގައި ފާހަގަކުރި ޤައުމީ ދުވަހުގެ ބެޖް

ނ. މަނަދޫގައި ޤައުމީ ދުވަސް ޤައުމީ ފެންވަރުގައި ފާހަގަ ކުރީ 1420ހ. (1999 މ.) ވަނަ އަހަރުއެވެ. އަތޮޅުގެ ރަށްރަށުގައި ޤައުމީ ދުވަސް ޤައުމީ ފެންވަރުގައި ބާއްވަވަން ސަރުކާރުން ނިންމަވާ އޭގެކުރިން ހއ. އުތީމުގަޔާއި ސ. ހިތަދޫގައި ޤައުމީ ދުވަސް ޤައުމީ ފެންވަރުގައިވަނީ ފާހަގަ ކުރައްވާފައެވެ. ގިނަ ދުވަސްތަކެއް ވަންދެން ޤައުމީ ދުވަހުގެ ރަސްމިއްޔާތު މާލޭގައި ބޭއްވުމަށްފަހު އަތޮޅުތެރޭގައި އަނެއްކާވެސް ޤައުމީ ފެންވަރުގައި ޤައުމީ ދުވަހުގެ ޚާއްޞަ ރަސްމިއްޔާތާއި ޕްރޮގްރާމްތައް ބޭއްވުމަށް ނިންމަވައި އެކަމަށް މިލަދުންމަޑުލު ދެކުނުބުރީގައި ވެރިކަންކުރާރަށް މަނަދޫ ހަމަޖެއްސެވިއެވެ.

ރައްޔިތުންގެ މަޖިލިހުގެ ނ. އަތޮޅުގެ ފުރަތަމަ މެމްބަރު

ގަލޮޅުގޭ މުޙައްމަދު ދީދީ

23 ސަޢުބާން 1351 (22 ޑިސެމްބަރު 1932) ގައި އިޢުލާން ކުރެވުނު ރާއްޖޭގެ ފުރަތަމަ ޤާނޫނު އަސާސީގައި ޤާނޫނު ހަދާ މަޖިލިހަކާއި ރައްޔިތުންގެ މަޖިލިހެއް ވަކިން އޮތް ދެ މަޖިލިހެއްގެ ގޮތުގައި ކަނޑައެޅިފައި އޮތެވެ. މިއަދު އެ ދެމަޖިލިހުން އަދާކުރި ޤާނޫނީ ޒިންމާތައް އަދާކުރަނީ ދިވެހިރާއްޖޭގ ރައްޔިތުންގެ މަޖިލިހުންނެވެ.

އެންމެފަހުން ހަވަރުބެރު ޖެހީ ޝައިޚް ރުޝްދީ އަވަހާރަވެގެން

އައްޝައިޚް އިބްރާހީމް ރުޝްދިލް އަޒުހަރީ

ހަވަރަކީ ހަގުބޭކަލުން ބެހިފައި އޮންނަ ހަ ބައެވެ. ނުވަތަ ރަދުންގެ ލަޝްކަރެވެ. ހަވަރު އެއްވުމަކީ ނުވަތަ ހަވަރު ހުއްޓި ލެއްވުމަކީ ހަވަރުގެ ފަރާތުން ރަދުންގެ އަރިހުގައި ރަސްމީގޮތުން ކޮންމެވެސް ބޮޑުކަމަކާމެދު އެއްޗެއް ދެންނެވުމަށްޓަކައި ގުޅަކުޅޭ ފަސްގަނޑަށް ހަވަރު އެއްވުމެވެ. މި އެއްވުން ގިނަ ފަހަރަށް އެއްވަނީ ހުކުރު ދުވަހު ހުކުރުން ފޭބުމަށް ފަހުގައެވެ. ހަވަރަށް ދެއްވުމަކީ ދައުލަތަށް ނުވަތަ ރަދުންނަށް ބޮޑުކުށެއް ކޮށްފި މީހަކަށް އަދަބު ދިނުމަށްޓަކައި ޚާއްޞަ ގޮތެއްގައި ހަނގުބޭކަލުން ބޭނުން ކޮންމެ ގޮތެއް އެމީހަކަށް ހަދައިލުމަށް ރަދުން އެމީހަކު އެބޭކަލުންނަށް ދެއްވުމެވެ. ހަވަރަށް ދިނުމަކީވެސް މިއީއެވެ. ހަވަރު ބެރަކީ ހަވަރު އެއްކުރާންޖަހާ ބެރެވެ.

ހުޅުދެލީގައި ހާޖީބަންޑާރައިން

ދ. ހުޅުދެލި ޒިޔާރަތް: 1981 ވަނަ އަހަރު

ބައްތެލި ފަހަރާއި އޮޑިފޯނި ފަހަރުވެސް ޒިޔާރަތްމަގާ އަރާ ހަމަވުމުން ރިޔާތައް ތިރިކުރާނެއެވެ. އެއީ ޒިޔާރަތަށް އިޙްތިރާމު ކުރުމުގެ ގޮތުން ކުރާކަމެކެވެ. އެކިއެކި މުސީބާތްތަކާއި ޖެހިގެން ނަދުރު ބުނާ ފަރާތްތަކުން ޒިޔާރަތާ ދިމާ ގޮޑުދޮށުގައި އޮޑި ދޯނި ފަހަރު ބީއްސާ ހަދައެވެ. ކޮންމެ އަހަރަކު "ޒިޔާރަތްފުޅު މާލޫދު" ކިޔުން އޮންނާނެއެވެ. މި މައުލޫދަށް ތައްޔާރު ކުރެވޭ ކާތަކެއްޗަށް ދައުވަތު އެރުވެނީ ބީރައްޓެހިންނަށެވެ. އެދުވަހަށް ޚާއްޞަ ހަރުގެއެއް އެރަށުގައި އަޅާނެއެވެ. އެއީ މާލޫދު ހަރުގެއެވެ. އެބޭފުޅެއްގެ ނަންފުޅަށް ނިސްބަތްވާ ހާޖީ ބަންޑާރައިންގެ ޒިޔާރަތެއް ކަމަށް ބުނެވޭ ޒިޔާރަތެއް އަދިވެސް ދ. ހުޅުދެލީގައި އެހެރީއެވެ.

ނ. އަތޮޅުގެ ތާރީޚް: ތޮޅެންދޫ މީހުން ކެނދިކުޅުދޫއަށް ބަދަލުކުރުން

ނ. ކެދިކުުޅުދޫގައި ބޭއްވި ތޮޅެންދޫ މީހުން ބަދަލުކުރުމުގެ ރަސްމިއްޔާތު

ދިވެހިރާއްޖޭގައި ރަށްރަށް ފަޅުކޮށް، އެހެން ރަށްރަށަށް މީހުން ބަދަލުވުމަކީ އަންޒަމާނުއްސުރެ ހިގަމުންދާ ކަމެކެވެ. އެހެންނަމަވެސް ދިރިއުޅެން ދަތި އުދަނގޫ ރަށްރަށުގައި ދިރިއުޅެމުންދާ ރައްޔިތުން ސަރުކާރުން ދިރިއުޅުން ފަސޭހަ ރަށްރަށް ބަދަލުކޮށް "އެއްފަސް" ކުރުމުގެ ސިޔާސަތު އުފަންވެގެންއައީ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލް ޤައްޔޫމުގެ ވެރިކަމުގެ ދުވަސްވަރުގައެވެ. އެ މަސައްކަތްތ ފެށިގެން އައިދުވަސްވަރު އެއީ ވަރަށް މަޑުމަޑުން ކުރިއަށްދާ ގިނަ ދުވަސްތަކެއް ނަގާ "ބޮޑު" މަސައްކަތެކެވެ. އެގޮތަށް އެއްފަސް ކުރުމުގެ މަސައްކަތްތައް ހިނގަމުން ދަނިކޮށް ނ. އަތޮޅުގައި އޮތް އާބާދީގެ ގޮތުން އެންމެ ކުޑަރަށް ކަމުގައިވާ ނ. ތޮޅެންދޫ ރައްޔިތުން ނ. ކެނދިކުޅުދޫއަށް ބަދަލުވާން އެއްބަސްވިއެވެ.

މަނަދޫ ސޭކުބޭ ވާހަކަ

ކުރީ ޒަމާނުގައި ހުކުރު، ހޯމަ ވިލޭރޭ ތަކުގައި އެބޭކަލަކު އެ އެނދު ދާންމަތިކޮޅުގައި އަވަހާރަފުޅު ލައްޕަވަން ވަޑައިގަންނަވާ ކަމަށް ބުނެވެއެވެ. އެރޭތަކުގައި އެ ގޭގައި އުޅޭ އެންމެން ނިދަން ތިބޭނީ އެތެރިގެބައިގައި، ދޮރުލައްޕާ ތަންޑުއަޅައިގެންނެވެ. އެބޭކަލެއްގެ މަރަވަޅި ކޮޅުގެ "ޓޮއްޓޮއް" އަޑު އިވެން ފެށުމާއެކު މުޅި ގޭތެރޭގައި މީރު ހުނވަދެއްގެވަސް ފެތުރިގެންދެއެވެ. އަނެއް ދުވަހު ބަލާއިރު އެނދު ދާންމަތިކޮޅުގައި އެބޭކަލަކު އަވަހާރަ ލެއްޕެވިކަމުގެ ނިޝާންތައް ފެންނަން ހުރެއެވެ. ބެޓްޝީޓަށް ހުންނަނީ ރޫޖެހިފައެވެ. ބާލީސްތަކާއި ކަންނެތޮތަކުގެ ތަރުތީބު ހުންނަނީ ގެއްލިފައެވެ. އެރޭރޭގައި ދިއްލާފައިހުންނަ ބައްތި ރީތިކޮށް ފޮހެ، ސާފުކޮށްފައިނެތިއްޔާ ބައްތި ނިވާލައްވާނެއެވެ. އަދި ތަންމަތިކޮޅު ރީތިކޮށް އަޅާފައި ނެތިއްޔާ ބެޑްޝީޓް އޮންނާނީ ބިންމައްޗަށް އެއްލާލާފައެވެ. ބުނެވޭގޮތުގައި އެރޭރޭ ރަށުގެ އެކި ހިސާބުތަކުގައި އެބޭކަލަކު ހިންގެވި އަޑު އިވުނު އެތައް ބަޔަކު ތިބެއެވެ.